पोखरा ।

गण्डकी प्रदेशका प्रमुख सचिव रविलाल पन्थको सरुवा भएको छ । मन्त्रिपरिषदको बुधबारको बैठकले ६ सचिवको सरुवा र भर्खरै बढुवा भएका २ सचिवको पदस्थापन गरेको हो । उनको ठाउँमा भर्खरै बढुवा भएकी लक्ष्मी बस्नेत आउने भएकी छन् । बस्नेत संघीय सरकारको महिला, बालबालिका तथा ज्येष्ठ नागरिक मन्त्रालयमा सहसचिव थिइन् ।

रविलाल पन्थले गण्डकीको प्रमुख सचिव भएर २० महिना बिताए । उनी २०७८ मंसिर १ गते गण्डकी प्रमुख सचिव भएर आएका थिए । उनको युवा तथा खेलकुद मन्त्रालयको सचिवमा सरुवा भएको छ । ३ वर्ष २ महिना मुख्यमन्त्री भएका पृथ्वीसुब्बा गुरुङको पालमा मात्रै ६ जना प्रमुख सचिव बदलिएका थिए । प्रदेशका सचिवहरु धेरै हेरफेर गर्दा काम गर्न कठिन भएको भन्दै उनले संघीय सरकारको आलोचनासमेत गरेका थिए ।

गण्डकीमा अहिलेसम्म सबैभन्दा लामो समय प्रमुख सचिव हुनेमा पछिल्ला प्रमुख सचिव रविलाल पन्थ रहे । उनी यहाँ २० महिना सेवारत भए । सबैभन्दा छोटो अवधिको प्रमुख सचिव नारागणप्रसाद बिडारीले २ महिनामात्रै काम गरेका थिए ।

सबैभन्दा सुरुमा पश्चिमाञ्चल क्षेत्रीय प्रशासक लक्ष्मण अर्याल नै तत्कालीन प्रदेश नम्बर ४ को प्रमुख सचिव भएका थिए । उनले पहिलोपटक सरकारले बजेट ल्याउँदा र प्रदेशको जग बसाल्न कर्मचारीका तर्फबाट महत्वपूर्ण भूमिका निर्वाह गरे ।