पोखरा ।
पोखरा २९ भण्डारढीकमा अवस्थित जनप्रकाश बहुमुखी क्याम्पसमा विपद व्यवस्थापन सचेतना बिहीबार भएको छ । क्याम्पसको आयोजना, सशस्त्र प्रहरी बल नम्बर २४ बटालियन हेडक्वाटर कालिका गण कास्कीको प्राविधिक सहयोग र ग्लोबल आइएमई बैंकको आर्थिक सहयोगमा सचेतना भएको हो ।

जनप्रकाशका अनुसन्धान विभाग प्रमुख युवराज आमिछानेको अध्यक्षतामा सञ्चालित उक्त कार्यक्रम सशस्त्र प्रहरी बल कालिका गणका गणपति धनबहादुर बानियाले विपदका बेला हुन सक्ने क्षति न्यूनीकरण गर्न कार्यक्रम प्रभावकारी हुने बताए । उनले सिकेका कुरा व्यवहारमा लागू सहभागीलाई आग्रह गरे ।

सो कार्यक्रमको पहिलो चरण क्याम्पसको सभाहल र प्रांगणमा गरिएको थियो भने दोस्रो चरण पोखरा¬ ३१ बेगनासताल स्थित मन्धरेपार्कमा भएको थियो । कार्यक्रममा जनप्रकाश बहुमुखी क्याम्पसमा अध्यनरत विद्यार्थी, प्रध्यापक, कर्मचारी एवंम स्थानीय जनसमुदाय सहभागी थिए । उनीहरुलाई विपतको बेलामा हुन सक्ने मानवीय क्षति न्यूनीकरण गर्ने उपाय सिकाइएको छ ।

कार्यक्रममा क्याम्पस प्रमुख ऋषिराम बुढाथोकी, सञ्चालक समितिका पूर्व अध्यक्ष कृष्णहरि भण्डारी, डुंगा व्यवसायी समिति अध्यक्ष रविप्रसाद कँडेल, पोखरा ३१ का कार्यवहाक अध्यक्ष महेन्द्रप्रसाद अधिकारी, जनप्रकाशका सहायक क्याम्पस प्रमुख अर्जुन ओझा, सशस्त्र प्रहरी बल कालीका गणका इनिस्पेक्टर उमेश ढकाल लगायतले बोलेका थिए ।