पोखरा ।

पोखरा महानगरपालिका २७ रिठ्ठेपानीकी सीता दर्जी चेक बाउन्सको मुद्दामा पक्राउ परेको विरोधमा पीडित पक्षले विरोध प्रदर्शन गरेका छन् । संयुक्त दलित संघर्ष समिति कास्कीको नेतृत्वमा सीताको परिवारसहितले जिल्ला प्रशासन कार्यालय कास्कीमा अगाडि मंगलबार नाराबाजी तथा धर्ना गरेका हुन् ।

उनीहरुले मिटरब्याज पीडित बन्दी सीता दर्जीलाई न्याय दे, मिटरब्याजी कमल थापालाई तत्काल गिरफ्तार गर, मिटरब्याजी कमिसनखोर विरुद्ध संयुक्त संघर्ष अगाडि बढाऔं’ जस्ता प्लेकार्ड सहित विरोध गरेका थिए ।

सीता दर्जीले २०७४ जेठ ८ गते स्याङ्जा गल्याङ नगरपालिका ७ घर भएका कमल थापासँग ६ लाख लिएको र २ वर्षमा पटकपटक गरी २१ लाख १० हजार बुझाइसकेका छन् । तर, १७ लाखको फर्जी तमसुक बनाई चेक बाउन्समा मुद्दा हालेर सीता दर्जीलाई फसाएको परिवारको आरोप छ ।

थापाले दर्जीको एनआइसी एसिया बैंक र एसबिआई बैंकका २/२ वटा चेक फकाइफुलाई तथा विभिन्न बाहना बनाई लगेको र सोही चेकलाई हतियार बनाएर चेक बाउन्स गरेको आरोप परिवारले लगाएको छ ।