पोखरा ।
सामाजिक विकास तथा स्वास्थ मन्त्री सुशीला सिंखडाले राज्यमा भएका समस्या जनता र सरकार मिले हल हुने बताएकी छन् । मानव सेवा आश्रम पोखरा छोेरेपाटनलाई औषधी वितरण गर्दै मन्त्री सिंखडाले यस्तो धारणा राखेकी हुन् ।

‘हिजो सडकमा देख्दा बिचरा भन्नेमात्र थियो,‘ उनले भनिन्, ‘व्यवस्थापन गर्ने टिमलाई धन्यवाद दिन्छु ।’ राज्यको जिम्मेवार पदमा बसेकाले निस्वार्थ भावले काम गरे धेरै काम गर्न सकिने उनले उल्लेख गरिन् । ‘मैले गर्नुपर्ने भूमिका निर्वाह गर्छु । स्वास्थ मन्त्रालयको समन्वय र सहयोगमा औषधी आएको छ, यो हाम्रो दायित्व हो,’ उनले भनिन् ।

सामाजिक विकास तथा स्वास्थ मन्त्रालयका स्वास्थ सचिव विनोदविन्दु शर्माले यस्तै संस्था कास्की मात्र नभएर अन्य जिल्लामा पनि भएको जनाए । मन्त्रालयका समाजिक सचिव तोयानाथ लम्सालले सामाजिक विकास मन्त्रालय प्रदेशले सडक मानव मुक्त प्रदेश घोषणा गरेको स्मरण गरे । गण्डकी प्रदेश सरकारले मानब सेवा आश्रममा ७० लाख बजेट विनियोजन गरेको छ ।

जिल्ला जनस्वास्थ्य कार्यालय कास्की प्रमुख बद्री आचार्यले ३३ प्रकारका मानसिक रोग सम्बन्धी र अन्य ३९ प्रकारका औषधी दिइएको जानकारी दिए । प्रदेश आपूर्ति केन्द्र, गण्डकी प्रदेश औषधी व्यवसायी, जिल्ला जनस्वास्थ्य कार्यालय कास्की सहयोगमा औषधी दिइएको हो । मानव सेवा आश्रम कास्की जिल्ला संयोजक सदिश पुनले १ सय पुरुष र ६७ महिला अहिले मानव सेवा आश्रममा रहेको जानकारी दिए ।