पोखरा ।
यस वर्षको तायाः मचा प्रतियोगिता रानीपौवामा हुने भएको छ । प्रतियोगिताको तयारी स्वरुप सचिवालयको उद्घाटन गरिएको छ । पोखराका सबै नेवार सुमुदाय अन्तर्गतका टोलटोलका संस्थाहरुले प्रतियोगितामा भाग लिने नेवा खल कास्कीका अध्यक्ष अशोक पालिखे जानकारी दिए । सचिवालयको उद्घाटन गर्दै नेवा खलः कास्कीका अध्यक्ष पालिखेले ताया मचाः प्रतियोगिताको तयारी तिव्र पारीएको बताए ।

नेवारी संस्कृतिको संरक्षणका लागि प्रतियोगिता आयोजना गर्न लागिएको पनि अध्यक्ष पालिखेले जानकारी दिए । नृत्य ननिस्क्ने ठाउँहरुमा तायामचाको नृत्य निस्कियोस् भनेर नेवा खलः कास्कीको सहयोगमा विभिन्न स्थानका नेवार समुदायहरुलाई बाजाको पूरा सेटसमेत हस्तान्तरण गरिएको थियो ।

प्रतियोगिताको प्रथम पुरस्कार ३ लाख ३३ हजार ३ सय ३३ रहेको समेत अध्यक्ष पालिखेले बताए । तायाः मचा नृत्य प्रतियोगताका मुख्य संयोजक ईश्वर कर्माचार्यले करिब २५ टिमले सहभागी जनाउने जानकारी दिए । कार्यक्रम भदौ १६ गते शनिबार रानीपौवामा हुने छ । यसअघि नेवा खल कास्कीले तायाः मचा सामग्री नभएको टोलहरुमा बाजासमेत हस्तान्तरण गरेको थियो ।

भदौ १४ गते आआफ्नो टोलमा प्रदर्शन गरेर प्रतियोगितामा सहभागिता रहने संयोजक कर्माचार्यले जानकारी दिए । संस्कृतिकर्मी तीर्थ श्रेष्ठले तायाः मचा पहिलो जस्तो नरहेको बताए । नाचमा चाहिने कुराहरुमा कमी आएकोप्रति चिन्ता लागेको व्यक्त गरे । उनले नाचमा टाउको कसरी हल्लाउने कसरी राग बजाउने र मौलिक शैलीमा ध्यान दिन आग्रह गरे ।