तनहुँ ।
गण्डकी प्रदेशको गौरवको आयोजनाका रूपमा रहेको शालिग्राम करिडर लोकमार्ग सडक खण्डमा कालोपत्र कार्यका लागि ठेक्का सम्झौता गरिएको छ । उक्त सडक खण्डमा कालोपत्र गर्नका लागि ३ ठेक्का सम्झौता गरी ठेकेदार कम्पनी निर्माण स्थलमा खटिसकेका पूर्वाधार विकास कार्यालय तनहुँले जनाएको छ ।

शालिग्राम कोरिडर अन्तर्गत ८२ किलोमिटर सडक छ । दासढुंगादेखि देउपुरसम्मको ६ दशमलव २ किलोमिटरमा यसअघि नै १३ करोडमा कालोपत्र भइसकेको छ । देउपुरबाट भतेरीसम्मको करिब १७ किलोमिटर दूरीमा कालोपत्रका लागि चालु आवदेखि नयाँ ठेक्का सम्झौता भएर प्रक्रियाअघि बढेको इन्जिनियर अमरेन्द्र यादवले जानकारी दिए । यो खण्डमा २ वर्षभित्र कालोपत्र सक्ने लक्ष्य छ ।

यस सडक निर्माणका लागि ८ करोड बजेट विनियोजन गरिएको छ । घिरिङ गाउँपालिकाको बैदीबाट पुटटारसम्मको ३२ किलोमिटर ग्राभेल सडक निर्माणका लागि २ ठेक्का सम्झौता भएका छन् । घिरिङको करुवाटारसम्मको २१ दशमलव ५ किलोमिटरका लागि ४ करोडमा सम्झौता भएको छ ।

करुवाटारदेखि १० दशमलव ४ किलोमिटरका लागि ४ करोडमा दोस्रो सम्झौता भएको इन्जिनियर यादवले बताए । दुवै सम्झौता अनुरुप चालु आर्थिक वर्ष ०८०÷८१ मा सम्पन्न गर्ने लक्ष्य छ । ३ ठेक्काको लागत १६ करोड छ ।

शालिग्राम करिडर लोकमार्ग अन्तर्गत देवघाटको दासढुंगा पुलबाट देउपुर, कोटा, रुपटार, मानपुर, डेढगाउँ, बैदी हुँदै पाल्पाको रामपुर र स्याङ्जा जोड्ने आयोजना रहेको कार्यालय प्रमुख दिनेशराज घिमिरेले जानकारी दिए । स्याङ्जाबाट रुपटार, पुटटार मधुवनटार लगायतका ६ बस्तीलाई यो सडकले जोड्नेछ ।

यो क्षेत्रमा कृषिदेखि औद्योगिक ग्राम स्थापनाकोसम्भावना रहेकाले यहाँका बस्तीलाई सडकसँग जोड्दै आर्थिक विकासका गतिविधि सञ्चालन गर्ने लक्ष्य राखिएको छ । सुरुमा पाल्पा र स्याङ्जालाई तनहुँसँग जोडेपछि कालीगण्डकी करिडोर हुँदै धार्मिक पर्यटकीयस्थल मुक्तिनाथ मन्दिरसम्म जोड्ने प्रदेश सरकारको दीर्घकालीन योजना छ ।