पोखरा ।
नेपाली कांग्रेस पोखरा १७ ले पोखरा महानगरपालिकाले विभिन्न शीर्षकमा अचाक्ली कर बढाएको भन्दै त्यो फिर्ता लिन माग गरेको छ । कांग्रेस वडा समिति पोखरा १७ ले वडाभित्र अपारदर्शी एवं लापरबाही ढंगले विकास, निर्माणका काम भएको भन्दै त्यसलाई रोक्नसमेत खबरदारी गरेको छ ।

वडा सभापति देवराज आचार्य र सचिवद्वय विनम गुरुङ र प्रेम ढकालद्वारा हस्ताक्षरित ज्ञापनपत्र बुधबार पोखरा १७ की वडाध्यक्ष राधिका शाही योगीमार्फत् पोखरा महानगरपालिकालाई पठाइएको छ । सभापति आचार्यको नेतृत्वमा गएको टोलीले पोखरा १७ भित्र भए÷गरेका विकास निर्माणका कामबारे जानकारीसमेत लिएको छ ।

आम वडाबासीको आवाज ज्ञापनपत्रमार्फत् मेयर धनराज आचार्यलाई पठाइएको इकाइ सचिव विनम गुरूङले बताए । अवैज्ञानिक ढंगबाट महानगरले कर वृद्धि गरेको जनाउँदै ज्ञापनपत्रमा त्यसलाई सच्च्याउन मागसमेत गरिएको छ ।