पोखरा ।
नेकपा एमालेका महासचिव शंकर पोखरेलले एमाले विरुद्व गरिएका कुप्रचारको प्रतिवाद गर्न निर्देशन दिएका छन् । एमाले कुनै पनि कालखण्डमा कुनै खाले भ्रष्टाचारका काण्डमा संलग्न नभएको उल्लेख गर्दै भ्रष्टहरुले नै एमाले पनि हामी जस्तै हो भन्ने भ्रम छर्ने प्रयास गरेको बताएका छन् ।

शुक्रबार गण्डकी प्रदेशबाट पार्टीको केन्द्रीय समिति र निकायमा प्रतिनिधित्व गर्ने नेताहरुको पोखरामा सम्पन्न बैठकलाई सम्बोधन गर्दै महासचिव पोखरेलले असत्य प्रचार गरेर पार्टी विरुद्व कुप्रचार गर्दा कुनै पनि नेता कार्यकर्ता चुप लागेर बस्न नहुने बताए ।

‘यति, ओम्नी, वाइबडी, गोकर्ण, प्रिन्टिङ प्रेस, गिरीबन्धु जति पनि नाम लिएर एमालेको बदनाम गर्न खोजिएको छ ती सबैका फाइल खोलेर अनुसन्धान गर्न पार्टीले चुनौति दिएको छ, फाइल खोल्दैनन् केबल बदनाम मात्र गर्न खोज्छन् ।’ महासचिव पोखरेलले भने, ‘ढुक्कले जनतालाई बताउनुस, एमालेले न हिजो भ्रष्टाचार गर्यो, न भोली गर्छ ।’

उनले आगामी निर्बाचनमा एमाले एक्लैलाई पूर्ण बहुमत ल्याउने अवस्थामा पुराउने गरी काम गर्न पनि नेता कार्यकर्तालाई निर्देशन दिए । एमालेका नीति र कार्यक्रम जनताले बुझ्ने गरी बताउने हो भने ५१ प्रतिशत भन्दा बढी मत पाउने दावी पनि उनको थियो ।

विहीबार र शुक्रबार गरी २ दिनसम्म चलेको बैठक विभिन्न प्रस्ताव पारित गर्दै सम्पन्न भएको छ ।