पोखरा ।
नेपाली कांग्रेसका सातै प्रदेशका पदाधिकारीको सम्मेलन स्थगित भएको छ । सभापति शेरबहादुर देउवाले पोखरा आउन नभ्याउने बताएपछि भदौ १६ र १७ गतेका लागि तय भएको प्रदेश पदाधिकारीको सम्मेलन हालका लागि स्थगित गरिएको कांग्रेस गण्डकी महामन्त्री विष्णु लामिछानेले जानकारी दिए ।

सम्मेलन उद्घाटन पार्टी सभापति देउवाले गर्ने तालिका थियो । तर, उनले समय नमिल्ने भनेपछि निर्धारित सम्मेलन स्थगित भएको हो । ‘भर्खरै सभापतिज्यूले फोन गरेर समय नमिल्ने भन्नुभयो, हालका लागि सम्मेलन स्थगित गरिएको छ, यसै महिना गर्ने हाम्रो तयारी छ,’ महामन्त्री लामिछानेले भने ।

प्रदेशले गरेका कामबारे अनुभव आदानप्रदान गर्ने उद्देश्यले सम्मेलन आयोजना गरिएको थियो । सम्मेलनले प्रदेशहरूको समन्वयात्मक भूमिका बढाउने विश्वास गरिएको छ । सम्मेलनमा एउटा प्रदेशबाट १० पदाधिकारीका दरले सहभागी हुने तय भएको थियो ।