दमौली ।
तनहुँको व्यास नगरपालिकाले सेवागाहीलाई सहज गराउन ‘व्यास डट घरनक्सा नेपाल डटकम’ अनलाइन पोर्टल सञ्चालनमा ल्याएको छ । सेवागाहीलाई घरबाटै आफनो घरनक्सा सम्बन्धीको विवरण जानकारी गराउने उद्देश्यले अनलाइन पोर्टल सञ्चालनमा ल्याएको नगरपालिकाको भवन नियमन तथा घरनक्सा पास शाखाका इन्जिनियर प्रवीण कैनीले जानकारी दिए ।

‘घर निर्माण गर्दा नगरपालिकाबाट प्रदान गरिने घरनक्सा सम्बन्धी कामकारबाही के कति भएको छ भने घरबाटै थाहा हुनेछ,’ उनले भने, ‘योसँगै उक्त कामका लागि सेवागाहीलाई नगरपालिका धाइरहनु पर्दैन ।’ उनका अनुसार नगरपालिकामा घरनक्सा दर्ता गरिसकेपछि आफनो फाइल कोड पाउन सकिन्छ । उक्त फाइलकोड वेबसाइटमा गएर लगइन गरेपछि आफ्नो फाइलको प्रक्रियागत जानकारी थाहा पाउन सकिन्छ ।

‘आफनो घरनक्साको फाइलको प्रक्रिया थाहा पाउनुको साथै आफनो कागजात हेर्न तथा डाउनलोड गर्न सकिन्छ,’ कैनीले भने । निकट भविष्यमा कागजगात रहित डिजिटल सेवा प्रदान गर्ने उद्देश्यले अनलाइन सेवा सुरु गरिएको नगर प्रमुख वैकुण्ठ न्यौपानेले बताए । ‘नगरपालिकालाई पूर्णरुपमा डिजिटिल बनाउन नगरपालिकाले नितिगत रुपमै अगाडि बढेको छ,’ उनले भने ।