पोखरा ।
पोखरामा २३ वर्षपछि १८ गते सोमबारदेखि २० गते बुधबारसम्म बाघ जात्रा देखाइँदै छ । लोपोन्मुख अवस्थामा रहेको जात्राको उजागर गर्न र युवापुस्तालाई पुस्तान्तरण गर्ने उद्देश्यले जात्रा गर्न लागिएको आयोजक समिति संयोजक जवाहरलाल श्रेष्ठले बताए । अन्तिम पटक २०५७ मोहरिया टोलले नचाइए पछि निरन्तरता दिन नसकिएको र यस वर्ष देखि पुनः निरन्तरता दिइने उनको भनाइ छ ।

‘मौलिक जात्राको रुपमा रहेको बाघजात्रा नेवार समुदायको मात्र नभएर सम्पूर्ण पोखरेलीकै जात्रा हो यसले सबै जातजातिलाई एक सुत्रमा बाध्न सहयोग पुग्नेछ,’ श्रेष्ठले भने ।

सय वर्ष भन्दा अघिदेखि शुरु गरिएको जात्रा पोखरामा पहिलो पटक २००६ मा प्रदर्शन गरिएको समितिका सचिव सुनिल उलकले बताए । यो जात्राको सुरुआत मानिस र बाघको द्वन्द्वसँग जोडिएको छ । गाउँ गाउँमा बाघले धेरै दुःख दिएपछि राजालाई यसबारे जानकारी दिइएको र राजाले सेनासहित आएर बाघ मारेको भनाइ छ । बाघको हैरानी र डरबाट मुक्ति भएको दिनको सम्झनामा जात्रा बनाइएको हो । अहिले यो नेपाली खासगरी नेवारी समुदायको मौलिक र महत्वपूर्ण जात्राको रुपमा स्थापित भएको उलकले बताए ।

जात्रामा सय जनासम्म जनशक्ति आवश्यक पर्ने समिति सदस्य शान्ति श्रेष्ठ उदासले जानकारी दिइन् । जात्रामा राजारानी, मन्त्री, घोडासहित सेना, कुमारी, लाखे, बाँसुरी धुन र जनता पात्रका रुपमा समावेश हुने उनले बताइन् ।