जोमसोम ।
थाक खेलकुद तथा सांस्कृतिक विकास संघले मुस्ताङको गर्ने बहुप्रतिष्ठित थाक खेलकुद प्रतियोगिता आगामी वशाख १५ गतेदेखि गर्ने निर्णय गरेको छ । शनिबार थासाङको कावाङमा भएको संघको पदाधिकारी, क्षेत्रीय सदस्य र क्लब अध्यक्षहरुको संयुक्त बैठकले बर्सेनि असोज गरिने प्रतियोगिता वैशाखमा सार्ने निर्णय गरेको हो ।

संघको साउन ६ गते भएको अधिवेशनपछि थासाङ २ कोवाङका कृष्णकुमार शेरचन अध्यक्ष चुनिएपछि पहिलो बैठक बसेको हो । बैठकले साबिकका खेलकुद प्रतियोगिता र अन्य कार्यक्रमलाई परिमार्जन गरी नयाँ ढंगले थाक खेलकुदलाई अघि बढाउने निर्णय गरेको छ । अन्तर क्लब पुरुष भलिबल प्रतियोगितालाई निरन्तरता दिने र महिला भलिबल प्रतियोगितालाई परिमार्जन गरिने भएको छ ।

संघले पुरस्कार राशि दोब्बर बनाएको अध्यक्ष कृष्णकुमार शेरचनले जानकारी दिए । अब हुने थाक खेलकुद प्रतियोगितामा पुरुष भलिबल च्याम्पियनले नगद १ लाख १ हजारसहित सिल्ड, मेडल, ट्रफी र प्रमाणपत्र पाउने छन् भने उपविजेता टोलीले नगद ६५ हजार १ सयसहित सिल्ड, मेडल ,ट्रफी र प्रमाणपत्र पाउने छ ।

तारा खेलको च्याम्पियनले ३० हजार र उपविजेताले २० हजारसहित सिल्ड, मेडल, ट्रफी र प्रमाणपत्र पाउने छन् । दुबै ईभेन्टका सर्वोत्कृष्ट खेलाडीले जनही नगद ३ हजारसहित सिल्ड, मेडल, ट्रफी र प्रमाणपत्र प्राप्त गर्ने छन् ।

तर, प्रतियोगितामा सहभागी नहुने क्लबका स्थानीय खेलाडी अन्य क्लबमा सहभागी हुन पाउने छैनन् । संघले वैशाखमा आयोजना हुने थाक खेलकुदमा हरेक क्लबलाई स्थानीय थकाली नृत्य प्रतियोगितासहित ३ नृत्य प्रस्तुत गर्न अनिवार्य बनाएको छ ।

संघले शनिबार कार्यसमितिलाई पूर्णता दिएको छ । यसअघि अध्यक्ष र उपाध्यक्षमात्र चयन भएकोमा वरिष्ठ उपाध्यक्षमा विनोद तुलाचन, सचिव विष्णु थकाली, कोषाध्यक्ष बिमला तुलाचन, सहसचिव ध्रुव परियार र सहकोषाध्यक्षमा तेजेन्द्र गौचन छानिएका छन् । सदस्यमा सन्तोष गौचन, भीम नेपाली र लक्ष्मी विक मनोनित भएका छन् ।

संघले ५ सदस्यीय क्षेत्रीय समितिसमेत गठन गरेको छ । जसमा जनहित क्लब जोमसोमबाट सुरज मल्ल, मिलिजुली युवा क्लब मार्फाबाट कविन्द्र ज्वाहारचन, नीलगिरी युवा क्लब टुकुचेबाट नरप्रसाद थकाली, धौलागिरी युवा क्लब कोवाङबाट मनोज थापा र निर्मल स्पोर्टिङ क्लब लेतेबाट मनोज नेपाली छन् ।

अध्यक्ष शेरचनले मुस्ताङको ऐतिहासिक धरोहरको रुपमा रहेको थाक खेलकुुदको संरक्षण, सम्वद्र्धन र विकासमा सामूहिक प्रयास जरुरी हुने औंल्याए । थासाङ गाउँपालिका अध्यक्ष प्रदीप गौचनले खेलकुद र संस्कृति संरक्षण गर्नु स्थानीय तहको पनि दायित्व भएकाले त्यसतर्फ कदम चाल्ने वाचा गरे । प्रतियोगिताको ५० औं संस्करण गत असोजमा थासाङको ताक्लुङमा भएको थियो ।