पोखरा ।
पोखराका इलेक्ट्रोनिक्स व्यवसायी करसम्बन्धी काम आफैं गर्न सक्ने बन्दै गएका छन् । पोखरा इलेक्ट्रोनिक्स व्यवसायी संघले संस्थाका सदस्यलाई पान तथा भ्याटको अनलाइन डाटा इन्ट्री सिस्टम सिकाउन तालिम दिएको हो ।

संस्थाले सदस्यलाई सित्तैमा करसम्बन्धी तालिम दिइरहेको अध्यक्ष नारायण सुवेदीले बताए । ‘आफ्नो व्यवसायको कर आफैं तिरौं, अरुको भर नपारौं भन्ने नाराका साथ करसम्बन्धी काम आफैं गर्न सक्ने बनाउन तालिम दिइरहेका छौं,’ अध्यक्ष सुवेदीले भने ।

पानमा दर्ता भएका व्यवसायीलाई आफैं कर तिरी कर चुत्ता निकाल्न सक्ने र भ्याटमा रहेकालाई विवरण दर्ता, टिडिएस फाइलिङ जस्ता काम गर्न सक्ने बनाउन तालिम आयोजना गरिएको हो । १०/१० जनाको समूह बनाएर सबै सदस्यलाई तालिम दिने संघको योजना छ ।

पश्चिमाञ्चल तालिम केन्द्रको संयोजनमा तालिम आयोजना भएको हो । अध्यक्ष सुवेदीले करको दायरामा आउन बाँकी इलेक्ट्रोनिक्स व्यवसायीलाई चाँडै दायरमा आउन र संघको समेत सदस्य बन्नसमेत आग्रह गरेका छन् ।

तालिमका सहभागीलाई अध्यक्ष सुवेदी र ब्लु बर्ड बिजनेस कन्सल्टेन्ट विनोद विनोद ढुंगानाले सहजीकरण गरिरहेका छन् । ३० गतेसम्म ६० जनालाई तालिम दिइने संघ महासचिव चिन्तामणि खरेलले बताए ।