‘आत्महत्या समाधान होइन’

समाधान संवाददाता २०८० भदौ २५ गते १५:२५

पोखरा ।
गण्डकी प्रदेश सभाकी उपसभामुख बिनाकुमारी थापाले आत्महत्या समस्याको समाधान नभएको बताएकी छिन् । विश्व आत्महत्या रोकथाम दिवसको अवसरमा पोखरामा आयोजित कार्यक्रममा उपसभामुख थापाले अशिक्षा, जनचेतनाको कमी तथा बेरोजगारीका कारण आत्महत्या गर्नेको संख्या बढ्दै गएकाले सुनाइन् ।


उनले यस्तो समुदायमा सचेतनाका कार्यक्रम सञ्चालन गर्नुपर्ने औंल्याइन् । ‘हरेक व्यक्ति अप्ठ्रोमा हुन सक्छ । त्यो अप्ठ्रोलाई परिवार र नजिकका मान्छेले बुझ्नु आवश्यक छ,’ उपसभामुख थापाले भनिन् । कार्यक्रममा गण्डकी प्रदेश स्वास्थ्य मन्त्रालय अन्तर्गतको सामाजिक तथा स्वास्थ्य महाशाखा प्रमुख जमुना पौडेलले आत्महत्या घटना न्यूनीकरण गर्नका लागि आध्यात्मिक र अध्ययनशील हुन आवश्यक रहेको बताइन् । उनले जीवनमा दुःखमा पनि खुसी हुन सके आत्महत्याको रोकथाम गर्न सकिने तर्क गरिन् ।


गण्डकी प्रदेश सामाजिक विकास तथा स्वस्थ्य मन्त्रालयको आयोजना र अनौपचारिक क्षेत्र सेवा केन्द्र (इन्सेक), कोशिश नेपाल, ओरेक र टिपिओ नेपाल लगायतका संघ, संस्थाको सहकायमा आयोजित विश्व आत्महत्या रोकथाम दिवस ‘आशा जगाऔं जीवन बचाऔं’ भन्ने नाराका साथ कार्यक्रम गरिएको हो । कार्यक्रमअघि पोखरा सभागृहबाट निकालिएको प्रभातफेरी जिल्ला समन्वय समिति कास्कीको हलमा गएर कोणसभामा परिणत भएको थियो ।

Advertisement


कार्यक्रममा मानवअधिकार रक्षक सञ्जाल कास्की अध्यक्ष केशु भुजेल, इन्सेक गण्डकी प्रदेश प्रमुख शिव खकुरेल, गैर सरकारी संस्था (गैसस) महासंघ गण्डकी अध्यक्ष गोपाल खड्का र राष्ट्रिय अपांग महासंघ गण्डकीका अध्यक्ष खोमराज शर्माले बोलेका थिए ।


कार्यक्रममा अपांग महासंघ गण्डकीका अध्यक्ष शर्माले अपांग भएका व्यक्तिमा जीवनमा बाच्ने रहर कम हुने बताए । वरिष्ठ मनोचिकित्सक प्राडा जयबहादुर खत्रीले आफूले आफैंलाई माया गर्न सिक्नुपर्ने बताए । उनले कुनै पनि व्यक्तिमा मानसिक बिरामी भएको लक्षण देखिए तुरुन्त अस्पताल पुर्‍याउन पनि आग्रह गरे ।

Advertisement


कार्यक्रमका अध्यक्ष निर्मल लामिछानेले दिनप्रतिदिन आत्महत्याका घटना बढ्दै गर्दा आउँदो दिनमा अवस्था कस्तो हुने हो भन्दै चिन्त्ता व्यक्त गरे । उनले आफू मनोचिकित्सक भएर काम गरेको लामो समय हुँदा प्रत्यक वर्ष आत्महत्या गर्नेको संख्या बढ्दै गएकाले त्यो डाटा हेर्न छाडेको बताए ।


‘म आत्महत्यासम्बन्धी डाटा सन् २०१९ सम्म त हेर्थें तर आजभोलि छाडें,’ उनले भने, ‘डाटा हेर्‍यो, डर लाग्छ । अवस्था भयावह छ । तर, अवस्था सुधार्नुपर्छ ।’ कोणसभामा राष्ट्रिय मानव अधिकार आयोग गण्डकीका प्रमुख मायादेवी शर्मा, कोशिस नेपालका सुदीप घिमिरे, कोपिला नेपालकी बिना शिलवाल लगायतले बोलेका थिए ।

तपाईको प्रतिक्रिया