पोखरा ।
कास्कीको रुपा गाउँपालिकाका सामुदायिक विद्यालयमा बिविध कार्यक्रम गरी ५९ औं राष्ट्रिय बाल दिवस मनाइएको छ । रुपाका ११ सामुदायिक विद्यालयमा विभिन्न अतिरिक्त क्रियाकलाप गरिएको असल छिमेकी सहयोग संघ (गोनेसा)नेपालका आय आर्जन अधिकृत अमृत अधिकारीले जानकारी दिए ।

रुपा गाउँपालिकासँगको सहकार्यमा सञ्चालित सामुदायिक विकास परियोजना अन्तर्गत गठन गरिएका बाल क्लबहरुले बाल विवाहको अन्त्य, बाल श्रम बिरुद्धको सचेतनामूलक कार्यक्रम गरी बाल दिवस मनाएका हुन् ।

देउरालीको विश्व शान्ति मावि र रुपाकोटको पृथ्वीरुपा माविमा अपांगमैत्री शिक्षा र बाल विवाह अन्त्यसम्बन्धी सचेतनामूलक नाटक प्रर्दशन गरिएको छ । रुपाकोटको चन्द्रप्रभा माविमा निबन्ध लेखन प्रतियोगिता गरिएको आय आर्जन अधिकृत अधिकारीले बताए । कालिका मावि, महेन्द्र आधारभूत विद्यालय, रुपाज्योति मावि, देउराली आधारभूत विद्यालय र जनता मावि पोल्याङमा सन्देशमुलक बाल गीत प्रतियोगिता गरिएको छ ।

बाल दिवसको सन्दर्भमा जटेश्वर मावि, ईन्द्रायणी आधारभूत विद्यालयमा बाल अधिकार सम्बन्धी वक्तृत्वकला प्रतियोगिता र अरुणोदय आधारभूत विद्यालयमा कविता प्रतियोगिता भएको छ । बाल विवाह तथा बाल श्रमको अन्त्य, बाल अधिकार, बाल विकास र गुणस्तरीय शिक्षालाई केन्द्रीत गरी भएको सबै प्रतियोगितामा विजयी विद्यार्थीलाई पुरस्कार र प्रमाणपत्र प्रदान गरिएको छ ।