पोखरा ।

राधा–लक्ष्मी स्मृति पुरस्कार शिक्षासेवी चतुरमान श्रेष्ठलाई प्रदान गरिने भएको छ । साहित्यिक, शैक्षिक, सामाजिक एवंं आध्यात्मिक व्यक्तित्व लक्ष्मीशरण उपाध्याय र राधा पौडेलको स्मृतिमा परिवारद्वारा स्थापित पुरस्कार हेमजा साहित्य प्रतिष्ठान नेपालद्वारा सञ्चालित छ ।

यो पुरस्कारको राशि ११ हजार १ सय ११ नगदसहित सम्मानपत्र र दोसल्ला छ । शैक्षिक क्षेत्रमा उल्लेख्य योगदान पुर्‍याएका श्रेष्ठको जन्म कास्कीको बाटुलेचौरमा भएको हो । २०१७ देखि २०५४ ससम्म अध्यापन गरी शैक्षिक क्षेत्रमा पुर्‍याएको योगदानको कदर गर्दै श्रेष्ठलाई पुरस्कृत गर्ने निर्णय गरिएको हो ।

लक्ष्मीशरण र राधाका छोराहरु केशवशरण र माधवशरणद्वारा स्थापित कोषको ब्याजबाट हरेक वर्ष यो पुरस्कार प्रदान गर्ने गरिएको छ । यो पुरस्कारबाट यसअभि छन्दकवि माधव वियोगी पुरस्कृत भइसकेका छन् । असोज ८ गते पोखरामा समारोह आयोजना गरी पुरस्कार प्रदान गरिने प्रतिष्ठानका अध्यक्ष बलराम पौडेलले जानकारी दिए ।