पोखरा ।

पत्रकार ऋषिकान्त पौडेल ‘यातायात व्यावसायिक पत्रकारिता पुरस्कार २०८०’ बाट सम्मानित भएका छन् । नेपाल पत्रकार महासंघ कास्कीको सहकार्यमा पोखरा यातायात प्रालिले हरेक वर्ष प्रदान गर्दै आएको पुरस्कारबाट पौडेल सम्मानित भएका हुन् ।

प्रालिको पाँचौ वार्षिक साधारण सभाको अवसरमा पोखरामा आयोजित कार्यक्रममा पौडेललाई पुरस्कृत गरिएको हो । १७ वर्षदेखि पत्रकारितामा क्रियाशील पौडेललाई नगद २५ हजार, सम्मान पत्रसहित पुरस्कृत गरिएको हो ।

सडक यातायातसँग सम्बन्धित सूचना एवम् सचेतनामूलक समाचारको माध्यमबाट आमजनता र सरोकारवालालाई सुसूचित गर्न योगदान पु¥याएकोमा उनलाई पुरस्कृत गरिएको हो । पौडेल कान्तिपुर टेलिभिजनमा आवद्ध छन् । उनी यसअघि हिमदूत पत्रकारिता पुरस्कारसहित विभिन्न संघ, संस्थाबाट सम्मानित भईसकेका छन् ।

यो पुरस्कारबाट यसअघि दीपेन्द्र श्रेष्ठ, गोविन्द सुवेदी, सन्तोष अधिकारी, अर्जुन गिरी, रञ्जन अधिकारी, यदुनाथ बञ्जरा, कमल पौडेल अथक लगायत सम्मानित भइसकेका छन् ।