पोखरा ।
संकल्प बचत तथा ऋण सहकारी संस्था लिमिटेडको १४ औं वार्षिक साधारण सभा सम्पन्न भएको छ । सभाको उद्घाटन गर्दै पोखरा महानगरपालिका वडा नम्बर ७ का वडा अध्यक्ष राममोहन आचार्यले सहकारीका ७ सिद्धान्तबाट विचलित नभई अगाडि बढेकाले नै संकल्प सहकारी अहिलेको विषम परिस्थितिमा आफूलाई जोखिमरहित राखेर मजवुत हुन सकेको बताए ।

रेडियो सफलताका स्टेसन प्रमुख मधु अधिकारीले सहकारीका प्राय सेयर सदस्य ज्येष्ठ नागरिक तथा घर गृहिणी रहेकाले आर्थिक चलायमान बढाउन युवा सेयर सदस्य बढाउनुपर्ने खाँचो औंल्याए । पूर्वअध्यक्ष पदमराज बरालले नेतृत्व हस्तान्तरण युवालाई गर्नुपर्नेमा जोड दिए ।

सभामा बचत तथा ऋणतर्फ उत्कृष्ट कारोबार गर्ने परिवेश रेग्मी र लीला बराललाई सम्मान गरिएको थियो । संस्थाको कोषाध्यक्षको प्रतिवेदन ध्रुवराज बराल र लेखा समितिको प्रतिवेदन सूर्यनाथ भट्टराईले प्रस्तुत गरे । संस्थाका अध्यक्ष पीताम्बर बरालको अध्यक्षतामा सम्पन्न उक्त सभामा स्वागत उपाध्यक्ष सावित्री बराल र संचालन सचिव नरेशप्रसाद बरालले गरे ।

सेयर पुँजी २ करोड ८ लाख १ हजार ६०० रहेको सहकारीमा ८९ जना महिला र १३१ जना पुरुष गरी २२० जना सेयर सदस्य छन् ।