कृषि तथा पर्यटन महोत्सव गर्दै घरपझोङ पालिका

सुन्दरकुमार थकाली २०८० असोज ८ गते १२:२०

जोमसोम ।
मुस्ताङको घरपझोङ गाउँपालिकाले कृषि तथा पर्यटन महोत्सव आयोजना गर्ने भएको छ । जिल्लामा उत्पादित कृषि उपज प्रर्दशनी, बजारीकरण तथा प्रर्वद्धन, मुस्ताङको धार्मिक कला, संस्कृति, मौलिकता, स्थानीय रहनसहन चिनाउन असोज १८ देखि २० गतेसम्म महोत्सव गर्न लागेको हो ।

Advertisement


शनिबार आयोजित पत्रकार सम्मेलनमा अध्यक्ष मोहनसिंह लालचनले मुस्ताङमा उत्पादित कृषि उपजलाई राष्ट्रिय तथा अन्तर्रांष्ट्रिय प्रर्वद्धन गरी कृषि उत्पादनलाई व्यवसायिक बनाउन र धेरै पर्यटकलाई यहाँको समग्र विषयवस्तुबारे जानकारी दिन महोत्सव आयोजना गरिएको जनाए । महोत्सवका लागि विभिन्न समिति र उपसमिति गठन भइसकेका छन् ।


उपाध्यक्ष जमुना थकालीले कृषि र पर्यटन आर्थिक समृद्धिको मेरुदण्ड रहेको उल्लेख गरिन् । उनले कृषि क्षेत्रलाई आत्मनिर्भर र व्यवसायिक बनाउन महोत्सव सहयोगी बन्ने उनको भनाइछ । घरपझोङले आयोजना गर्ने कृषि तथा पर्यटन महोत्सवमा स्थानीय भेषभूषा चिनाउने, स्थानीय उत्पादनको प्रचारप्रसार, सूचनामूलक कार्यक्रम र पर्यटन र कृषि लक्षित स्टल रहने प्रमुख प्रशासकीय अधिकृत वेदहरि अधिकारीले जानकारी दिए ।

Advertisement

महोत्सव गण्डकी प्रदेशका मुख्यमन्त्री सुरेन्द्रराज पाण्डेले उद्घाटन गर्ने कार्यक्रम छ । सोही अवसरमा मुख्यमन्त्री पाण्डेले घरपझोङ गाउँपालिकको नवनिर्मित प्रमुख प्रशासकीय भवन र आपत्कालीन भवनसमेत उद्घाटन गर्ने छन् ।


महोत्सवमा गाउँपालिकाले प्रवाह गर्ने सेवाबारे जानकारी, कृषि बाली तथा तरकारी र फलफूल लगायतका सूचना केन्द्र, स्थानीय कलासंस्कृति झल्किने प्रदर्शनी, स्थानीय मौलिक झाँकी, रैथानेबालीका परिकारको स्टल, खुला तारा र खुला भलिबल प्रतियोगिता हुने छन् ।


महोत्सवमा राष्ट्रिय स्तरमा ख्याप्ति प्राप्त कलाकारका प्रस्तुति र र स्वास्थ्य परीक्षण शिविरसमेत राखिने भएको छ । खुला तारा खेलका विजेताले नगद ५० हजारसहित सिल्ड, मेडल र प्रमाणपत्र पाउने छन् । उपविजेताले नगद २५ हजारसहित पाउने छन् । भलिबलतर्फ च्याम्पियनले नगद १ लाख र उपविजेताले नगद ५० हजारसहित सिल्ड,मेडल र प्रमाणपत्र पाउने छन् ।

सुन्दरकुमार थकाली

थकाली समाधान दैनिकका मुस्ताङ संवाददाता हुन्  

तपाईको प्रतिक्रिया