पोखरा ।
सरकारले पोखरा अल्ट्रालाइट प्रालिलाई सम्मान गरेको छ । विश्व पर्यटन दिवस २०२३ को अवसरमा बुधबार संस्कृति, पर्यटन तथा नागरिक उड्डयन मन्त्रालयले अघिल्लो वर्ष पर्यटन क्षेत्रमा सबैभन्दा बढी योगदान गरेका कम्पनीहरुलाई सम्मान गरेको छ ।

बुधबार आयोजित कार्यक्रममा पर्यटनमन्त्री सुदन किराँतीले पोखरा अल्ट्रालाइटसहित अन्य विभिन्न क्षेत्रका कम्पनीलाई सम्मानित गरेका हुन् । अल्ट्रालाइटले साहसिक खेल अन्तर्गत सन् २०२२ अगस्ट १ देखि २०२३ अगष्टसम्ममा सबैभन्दा बढी विदेशी मुद्रा आर्जन गर्न सफल भएकाले सम्मानित भएको हो ।

पोखरा अल्ट्रालाइटका तर्फबाट योगेन्द्र थापाले सम्मान ग्रहण गरेका थिए । यस कम्पनीले ४४ हजार ३ सय ८८ अमेरिकी डलर आर्जन गरेको छ । पोखरामा सन् २०११ देखि पोखरा अल्ट्रालाइटले साहसिक खेलका पारखीका लागि उडान गराउँदै आएको छ । पोखराको बाराही चोकमा कार्यालय रहेको यस कम्पनीका अध्यक्ष विप्लव पौडेल हुन् भने म्यानेजिङ डाइरेक्टरमा पोमनारायण श्रेष्ठ छन् ।

पछिल्लो समय अल्ट्रालाइटमा उडेर विभिन्न हिमशृंखला तथा पोखरा सहरको मनोरम दृश्यावलोकनका लागि अल्ट्रालाइट लोकप्रिय बन्दै गएको छ ।