सम्पादकीयः अमानवीय आन्दोलन

समाधान संवाददाता २०८० असोज ११ गते १२:००

अहिले देशभरका चिकित्सक आन्दोलनमा छन् । इमर्जेन्सीबाहेकका सेवा बन्द गरी सुरक्षाको माग गर्दै डाक्टरहरु सडकमा उत्रिँदा बिरामी भने मर्कामा परेका छन् । स्वास्थ्य सेवा छाडी डाक्टरहरु आन्दोलन उत्रिने अवस्था आउनु चिन्ताको विषय त हो नै, स्वास्थ्य सेवा जस्तो अत्यावश्यक सेवा बन्द गरी चिकित्सकहरु सडकमा आउनु पनि उचित हुँदै होइन । बिरामीको ज्यान गएपछि भएको तनावबाट सिर्जित अवस्थाका कारण फेरि उपचार नपाएर अर्काे बिरामीको अकालमै ज्यान जाने परिस्थिति बन्नु हुँदैन ।

सोमबार मणिपाल अस्पतालमा उपचाररत एक महिलाको मृत्यु भएपछि उपचारमा संलग्न डाक्टरमाथि कुटपिट भयो भने अस्पतालमा तोडफोड पनि भयो । यो गैरकानुनी र अराजक गतिविधि हो । अराजक र गैरकानुनी गतिविधि नियन्त्रण गर्ने दायित्व राज्यको हो । राज्यले यो घटनाको छानबिन गरिरहेकै छ । सुरक्षा निकायले छानबिन गरिरहेकै बेला सेवा बन्द गरी डाक्टर र डाक्टर आवद्ध संघ, संगठन सडकमा आउँदा ठूलो लगानी र श्रम गरेका चिकित्सकहरु पनि आम पेशाकर्मीजस्तै भएको देखिएका छन् ।


डाक्टरमाथि बेला बेलामा आक्रमण प्रयास भइरहेका छन् । जुन निन्दनीय छन् र रोक्नैपर्ने अराजक गतिविधि हुन् । तर, मणिपालको घटनामा डाक्टरहरुसमेत बिरामीका आफन्तसँग मुठभेडमा उत्रिएको देखियो । सुरक्षाकर्मीले नै डाक्टरलाई कुटेर आएँ भनेको भिडियो सार्वजनिक भयो । अस्पतालमा होस् कि अन्यत्र, जुनसुकै यस्ता घटनामा राजनीतिक संलग्नता देखिन्छ । यहाँ पनि राजनीति आवरण देखियो, जुन अनपेक्षित थियो । अहिले डाक्टरको आन्दोलनले धेरै बिरामीले उपचार पाएका छैनन् । कतिपय बिरामीको औषधिको तालिका छुट्यो भने कतिपयको रोग पहिचान हुन सकेन । कतिपयको फलो अप रोकिँदा उपचार नै प्रभावित बन्यो । राज्यलाई सम्झौता गर्न बाध्य बनाउने नाममा सेवा नै ठप्पा पारिनु जायज होइन ।

Advertisement


समाजले चिकित्सकमाथि विश्वासमात्रै गर्दैन, उच्च सम्मान पनि गर्ने गरेको छ । तर, बिरामीको उपचार पाउने हक हनन गर्दा चिकित्सकप्रति वितृष्णा पैदा हुन्छ । जसले बिरामी–चिकित्सक सम्बन्ध झन् बिगार्छ । संविधानले आधारभूत स्वास्थ्य सेवालाई मौलिक हक अन्तर्गत राखेको छ । आवश्यक सेवा सञ्चालन ऐन, २०१४ ले दिएको अधिकार प्रयोग गरेर गृह मन्त्रालयले जारी गरेको सूचना अनुसार अस्पताल, स्वास्थ्य केन्द्र, एम्बुलेन्स, औषधि निर्माण तथा बिक्रीवितरण हडताल निषेधित क्षेत्र हुन् ।

समाजका मर्यादित पेशाकर्मीले गर्न नसुहाउने काम हो स्वास्थ्य संस्था बन्द । सरकारले कुटपिट गरिएका चिकित्सकलाई न्याय दिलाउनुपर्छ, दोषीलाई कारबाही गर्नुपर्छ । छानबिन जारी रहेकै अवस्था दोषी यकीन गर्न सकिँदैन । चिकित्सकबाटै लापरवाही भएका घटना पनि आईरहन्छन् । कमसेकम छानबिन हुने वातावरण बनाऔँ । सर्वसाधारणलाई गुणस्तरीय उपचार पाउने, स्वाथ्य संस्था निर्वाध सञ्चालन हुने र स्वास्थ्यकर्मीलाई सुरक्षाको ग्यारेन्टी गर्ने दायित्व सरकारको हो । दायित्व निर्वाह गरी यथाशीघ्र डाक्टरहरु काममा फर्किने वातावरण बनाउनैपर्छ ।

Advertisement

तपाईको प्रतिक्रिया