पोखरा ।
यामाहाको नेपालस्थित आधिकारिक बिक्रेता एमएडब्लुले एएसपी र स्पेयर पार्ट्स मिट गरेको छ । असोज १० र ११ कार्यक्रम पोखरामा गरिएको थियो । कार्यक्रममा यामाहाका सबै एएसपी सञ्चालक र स्पेयर पार्ट्स प्रदायकहरू सहभागी रहे ।

एएसपीबाट १२० र स्पेयर पार्ट्सबाट १४० गरी २६० जनाको सहभागिता रहेको कार्यक्रममा एमएडब्लुका सिइओ राजु छेत्री समेत सहभागी थिए । कार्यक्रममा नेटवर्किङ, ज्ञान साझेदारी र सहकार्यको विषयमा अन्तक्र्रिया गरिएको थियो । कार्यक्रममा एएसपीका सदस्यहरुलाई बिक्रीपछि दिइने सेवा, गुणस्तरीय सेवाको बारेमा तालिम दिइएको थियो । स्पेयर पार्ट्स इन्चार्जलाई इन्भेन्टरी व्यवस्थापन, सवारी साधनको स्थायित्व र सवारको सुरक्षाका लागि वास्तविक स्पेयर पार्ट्सको प्रयोगको महत्वको बारेमा तालिम दिइएको थियो ।

सिइओ छेत्रीले कार्यक्रम गर्नुको प्रमुख उद्देश्यमाथि प्रकाश पार्दै एएसपीको नेटवर्कलाई अझै बिस्तार गर्नु रहेको बताए । उनले स्पेयर पार्टस बिक्रेताहरुको नेटवर्क पनि अझै अगाडि लैजान कार्यक्रम फलदायी भएको विश्वास व्यक्त गरे ।