जोमसोम— मुस्ताङको घरपझोङ गाउँपालिकाद्धारा आयोजना हुँने प्रथम कृषि तथा पर्यटन महोत्सवमा ३० लाख खर्च र ३० लाख आम्दानी हुँने प्रक्षेपण गरिएको छ । गाउँपालिकाद्धारा सार्वजनिक गरिएको महोत्सव संञ्चालन सम्वन्धि प्रस्तावनामा महोत्सव खर्च र आम्दानी बराबरी हुने प्रक्षेपण गरिएको हो ।
घरपझोङ गाउँपालिकाको लागि मात्रै नभई समग्र मुस्ताङ जिल्लाकै कृषि र पर्यटन व्यवसायको प्रर्वद्धन गर्ने उद्देश्यसहित बिहिबारदेखि मुस्ताङ सदरमुकाम जोमसोममा महोत्सव संञ्चालन हुँने बताईएको छ । कृषि र पर्यटन लक्षित विभिन्न उद्देश्यसहित आयोजना हुन लागेको प्रथम कृषि तथा पर्यटन महोत्सवमा सोही प्रक्षेपण अनुसार आवश्यक तयारी अन्तिम चरणमा पू¥याईएको बताईएको छ ।
कृषि तथा पर्यटन महोत्सवका लागि गाउँपालिकाले ५ लाख अनुदान रकम विनियोजन गरेको हो । महोत्सवका लागि प्रायोजक तथा विज्ञापन दाताबाट १० लाख, आर्थिक सहयोग १० लाख,टिकट बिक्रीबाट २ लाख, खेलाडीहरुको प्रवेश शुल्क वापत १ लाख,बिक्री स्टल शुल्कबाट १ लाख र अन्य विविधबाट १ लाख गरी ३० लाख आम्दानी हुँने प्रक्षेपण गरेको हो ।
यसैगरी व्ययखर्चतर्फ उद्घाटन कार्यक्रम( अतिथि सत्कार,मञ्च व्यवस्थापन,जलपान) ४ लाख,स्टल निर्माण,गेट तथा ठाउँ व्यवस्थापनमा ५ लाख,खैल मैदान निर्माणमा १ लाख ५० हजार, उत्कृष्ट पुरस्कारतर्फ ३ लाख ५० हजार, दोहोरी कलाकार खर्च ४ लाख,साउण्ड सिस्टममा २ लाख ,प्रचार प्रसारमा २ लाख, अतिथि तथा कार्यक्रममा खटिने कर्मचारी तथा पदाधिकारीलाई खाना खर्च २ लाख,सरसफाई तथा सरसफाई कर्मचारी व्यवस्थापन खर्च १ लाख, झाँकी तथा नाचगान व्यवस्थापन खर्च १ लाख,बिजुली र पानी खर्च १ लाख ५० हजार,मसलन्द तथा खेलकुद सामाग्री खर्च १ लाख ५० हजार र विविध खर्चतर्फ १ लाख गरी ३० लाख खर्च अनुमानित गरिएको हो ।