पोखरा ।
बरपाण्डेथुम ज्येष्ठ नागरिक चौतारीले पोखरा महानगरपालिका वडा नं. ३३ मा उन्नत जातको बोका हस्तान्तरण गरेको छ । ज्येष्ठ नागरिक सीप विकास कार्यक्रम अन्तर्गत वडाका उद्यमशील किसान तिलकराज आचार्यलाई उन्नतजातको बोका हस्तान्तरण गरेको हो ।

बाख्रा पालनबाट ज्येष्ठ नागरिकरूको आर्थिक जीवनस्तर माथि उठाउनका लागि बाख्रा पालनलाई प्रोत्साहन गर्ने प्रदेश सरकारको नीति अनुरुप बाख्रा वितरण गरिएको थियो । त्यही कार्यक्रम अन्तरगत मंगलबार किसानलाई उन्नत जातको बोका हस्तान्तरण गरेको चौतारीका सचिव मोती भुजेलले बताए ।

गत असार महिनामा बरपाण्डेथुम ज्येष्ठ नागरिक चौतारीले मञ्जु आचार्य, डिलमाया भुजेल, यसोदा आचार्य, ओमबहादुर बानिया, तिलकरामआचार्य, गंगाराम लम्साल, टीकाबहादुर नेपाली, शान्ति भुजेल, गुरुप्रसाद भुवाई, कलिमाया भुजेल, नरहरि आचार्य, उजेली लम्साल लगायत १२ घरपरिवारका जेष्ठ नागरिकहरुलाई दुइ वटाका दरले उन्नत जातका २४ वटा बाख्रा पाठी वितरण गरेको थियो ।

केही समयअघिदेखि १०० प्रतिशत बोयर जातका बाख्रा पालन गरी बिक्रीबितरण गर्दै आइरहेको अन्नपूर्ण फार्मस् फार्म आर्बाबाट ९५ प्रतिशतको बोयर बोका खरिद गरी किसानलाई दिएको हो । उक्त बोयर बोका बाट उचित प्रतिफल लिन सकिने भन्दै किसान तिलकराज आचार्यले खुशी व्यक्त गरे ।