पोखरा ।

पोखरा महानगर खेलकुद विकास समितिको आयोजना पोखरा रंगशालामा जारी पोखरा महानगर स्तरीय अन्तर क्लब टी–२० क्रिकेट प्रतियोगितामा आइतबारका खेलमा कास्की क्रिकेट क्लव र अरण्यज्योति क्रिकेट क्लब विजयी भएका छन् ।

पहिलो खेलमा कास्कीले राइजिङ क्रिकेट क्लवलाई ७ विकेटले पराजित गर्‍यो । टस जितेर ब्याटिङ गरेको राइजिङले १३ ओभरमा सम्पूर्ण विकेट गुमाएर ४७ रन बनाएको थियो । राजइजिङका अनिल गुरुङले १८ रन जोडे । कास्की क्रिकेटका बलरहरु नितेश गिरी र आदित्य थापाले समान ३ विकेट लिए ।

४७ रनको लक्ष्य कास्कीले १३.२ ओभरमै भेट्टायो । कास्कीका विष्णु सर्माले १९ तथा शाहिल कुँवरले १३ रन बनाए । बलिङतर्फ ३ विकेट लिएका कास्कीका आदित्य थापा म्यान अफ द म्याच भए । उनलाई आयोजक समितिका सदस्य सचिव सुवास खड्काले पुरस्कृत गरे ।

अर्को खेलमा अरण्यज्योतिले पोखरा क्रिकेट क्लबलाई २ विकेटले पराजित गर्‍यो । पहिला ब्याटिङ गरेको पिसिसीले पूरा २० ओभरमा ७ विकेट गुमाएर १ सय ३२ रन बनाएको थियो । पिसिसीको तर्फबाट मुस्कान थापाले ६० तथा अर्जुन बुढाथोकीले ३५ रन बनाए । अरण्यज्योतिका बलरहरु इर्साद आलमले ३ तथा सन्तोष सर्माले २ विकेट लिए ।

अरण्यज्योतिले १७.३ ओभरमा ८ विकेट गुमाएर जित हाँसिल गर्‍यो । अरण्यज्योतिको ब्याटिङमा म्यान अफ द म्याच अषेश न्यौपानेले ५१, दिवस गिरीले २२ तथा सन्तोष सर्माले १७ रन जोडे । पिसिसीका विजय रावतले ह्याट्रिकसहित ३ विकेट लिए । प्रमोद बास्तोलाले २ विकेट लिएका थिए ।