हिमालय आँखा अस्पताललाई जापानी सहयोग

समाधान संवाददाता २०८० असोज २५ गते ११:१६

पोखरा ।
पोखरा १७ घारीपाटनमा रहेको हिमालय आँखा अस्पताललाई जापान सरकारले विभिन्न उपकरण हस्तान्तरण गरेको छ । बुधबार आयोजित समारोहमा नेपालका लागि जापानी राजदूत किकुता युताकाले औपचारिक रुपमा सामग्री हस्तान्तरण गरे ।


राजदूत किकुताले गण्डकी प्रदेशको वर्षमै डेढ लाखभन्दा बढी आँखाका रोगीलाई सेवा दिने, ७ हजारभन्दा बढी शल्यक्रिया हुने अस्पताललाई सघाउन पाएको भन्दै खुसी व्यक्त गरे । उनले भने, ‘हामीले प्रदान गरेका मेसिनहरु यहाँ आइपुग्नेबित्तिकै शल्यक्रिया र शिविरहरुमा प्रयोग भए भन्ने जानकारी पाउँदा म निकै हर्षित छु ।’


नेपाल नेत्रज्योति संघ कास्की अध्यक्ष सुरेन्द्र थापामगरले नयाँ उपकरण आएपछि अस्पतालले चलाउने शिविरहरुमा काम गर्न सहज हुने बताए । उनले भने, ‘हामीले गण्डकी र कर्णालीका विभिन्न दुर्गम क्षेत्रमा आँखा शिविरहरु गर्दै आएका छौं । पोर्टेबल रुपमा लैजान मिल्ने यी उपकरणले एकातिर हामीलाई सेवा दिन सहज हुन्छ भने अर्कातिर दुर्गमका सेवाग्राहीले सहजै गुणस्तरीय सेवा पाउनुहुन्छ ।’

Advertisement


जापान सरकारले एबी स्क्यान, अटो रिफ्याक्टोमिटर, भ्याकुम अटोक्लोभ, लुमियर फ्लो मेसिन र एन्टेरियर भेरिक्टोमी मेसिन प्रदान गरेको हो । यी मेसनको लागत ७६ लाख १७ हजार छ । राजदूत किकुताले जापान सरकारको तर्फबाट मातृशिशु मितेरी अस्पताललाई पनि स्वास्थ्य उपकरण हस्तान्तरण गरेका छन् ।


सन् १९९३ मा स्थापना भएको हिमालय आँखा अस्पतालले तीन दशकदेखि आँखा उपचार सेवा दिँदै आएको छ । उपचारबाट निको बनाउन सकिने अन्धोपन हटाउने उद्देश्यले यसको स्थापना भएको हो ।

Advertisement

तपाईको प्रतिक्रिया