पोखरा ५ मा फुटबल र दौड हुने

समाधान संवाददाता २०८० असोज २५ गते १२:५४

पोखरा ।
पोखरा महानगरपालिका वडा नम्बर ५ को आयोजनामा फुटबल र दौड प्रतियोगिता हुने भएका छन् । अन्तर टोल स्तरीय प्रथम सेभेन ए साइड फुटबल प्रतियोगिता असोज २६ देखि २८ गतेसम्म मालेपाटन खेल मैदानमा हुन लागेको हो ।


फुटबलतर्फ वडाका २४ वटै टोल विकास संस्थाले सहभागिता जनाउने अपेक्षा गरिएको वडाध्यक्ष विष्णुप्रसाद बरालले बताए । फुटबलमा विजेता टिमलाई २६ हजार ६ सय ६६ र उपविजेता टिमलाई १३ हजार ३ सय ३३ रुपैयाँ, ट्रफी, मेडल र प्रमाणपत्र प्रदान गरिनेछ ।


दौड प्रतियोगिताका ३ इभेन्ट खुला दौड पुरुष, खुला दौड महिला र ६० वर्ष माथिको उमेर समूहको दौड हुने छन् । असोज २७ गते शनिबार बिहान पौने ७ बजे सुरु हुने दौड प्रतियोगिताका सहभागीले वडा नं. ५ का विभिन्न मार्गहरु भएर ७ दशमलव २ किलोमिटर दूरी पूरा गर्नुपर्ने छ ।

Advertisement


दौड प्रतियोगितामा ५ सय जनाको सहभागिता हुने अपेक्षा आयोजकले गरेको छ । सबै विधाको दौड प्रतियोगिताका विजेताले समान ६ हजार ६ सय ६६ रुपैयाँ, द्वितीय हुनेले ४ हजार र तृतीय हुनेले २ हजार ६ सय ६६ नगदका साथमा मेडल र प्रमाणपत्र हात पार्ने छन् ।


फुटबल र दौड दुवैतर्फ नाम र टिम दर्ता गर्न शुल्क लाग्दैन । प्रतियोगितामा भाग लिन पोखरा ५ मा स्थायी वा अस्थायी बसोबास गरेको भने हुनुपर्ने छ । इच्छुक वडावासी खेलाडीलाई असोज २४ गतेसम्म टिम दर्ता गर्न वडाले आग्रह गरेको छ । ‘स्वास्थ्यका लागि खेलकुद’ भन्ने नाराका साथ आयोजना गरिएको प्रतियोगिता सम्पन्न गर्नका लागि तयारी अन्तिम चरणमा पुगेको वडा सदस्य हरिमाया विकले बताइन् ।

Advertisement

तपाईको प्रतिक्रिया