लेखनाथ ।
चाडबाडको समयमा हुन सक्ने घटनालाई ध्यानमा राख्दै गण्डकी ट्राफिक प्रहरी कार्यालयले ग्रामीण ट्राफिक सचेतना कार्यक्रम चलाएको छ । बजार क्षेत्रबाट नजिकका ग्रामीण क्षेत्रमा चल्ने यातायातका साधनमा होसियारी नअपनाउँदा हुने सक्ने घटनाबारे चालक, सहचालक र यात्रुलाई जानकारी दिइएको हो ।

यसैक्रममा डाडाँकोनाक ट्राफिक कार्यालयले पोखराबाट बेगनास, रुपा, भरतपोखरी र माझठाना क्षेत्रमा चल्ने सवारी साधनहरुलाई ठाउँठाउँमा रोक्दै क्षमताभन्दा बढी यात्रु नराख्न, तीव्रगतिमा सवारी नचलाउन, लाइसेन्स लिएर मात्र सवारी चलाउन र चालकले मादक पदार्थ सेवन नगर्न आग्रह गर्दै आएको हो ।

ग्रामीण ट्राफिक सचेतना कार्यक्रम अन्तर्गत डाँडाकोनाक ट्राफिक कार्यालयका प्रहरी साहयका निरीक्षक जितबहादुर केसी र प्रहरी सहायक हवल्दार पदमसिंह धामी लगायतको टिमले आफ्नो क्षेत्राधिकारभित्र दैनिक रुपमा बस, टेक्सीदेखि मोटरसाइकलका यात्रुहरुलाई बिच बाटोमा रोकेर नियमका बारेमा जानकारी गराउँदै आएको बताएका छन् ।