पुष्प मेलामा २४ स्टल

समाधान संवाददाता २०८० कार्तिक १५ गते १४:००

पोखरा ।
वडादसैं सकिएपछि बजार र जनजीवन पूर्ववत् रुपमा सुरु भएको छ । सँगसँगै आउनै लागेको नेपालीको दोस्रो ठूलो पर्व तिहारको तयारीसमेत सुरु भएको छ । तिहार लक्षित खानेकुरा, फूल, फलफूल, ढाका टोपी बजारमा ल्याउने तयारी भएको छ ।


तिहारकै छेको पारी फ्लोरिकल्चर एसोसियसन(फ्यान) कास्कीले पुष्प मेला आयोजना गर्ने भएको छ । कात्तिक १७ देखि २० गतेसम्म पोखरा रंगशालामा सातौँ गोदावारी पुष्प प्रदर्शनी तथा चौथो गण्डकी प्रादेशिक पुष्प मेला हुन लागेको हो । प्रदर्शनीमा व्यावसायीक स्टल २०, कृषि सामग्रीका स्टल तीन र सूचनामूलक एक गरी २४ प्रदर्शनी कक्ष रहने आयोजकले जनाएको छ ।


फ्यान कास्कीले मङ्गलबार आयोजना गरेको पत्रकार सम्मेलनमा अध्यक्ष डिलबहादुर गुरुङले प्रदर्शनी २० हजारभन्दा बढीले अवलोकन गर्ने अपेक्षा सुनाए । पुष्प खेतीको व्यावसायिक विकास तथा प्रर्वद्धनका लागि लगातार प्रदर्शनी आयोजना गर्दै आएको जनाए । फूलका पारखीलाई सहज रुपमा विरुवा उपलब्ध गराउन र घर, बगैंचा सजाउन तथा स्वागत सत्कारमा प्रयोग हुने फूल सहज उपलब्धता गराउन मेला सहयोगी हुने अपेक्षा गरिएको छ ।

Advertisement


मेलामा यस वर्ष भित्रिएका गोदावारी फूलका नयाँ प्रजातीका फूल विरुवासमेत प्रदर्शनी तथा बिक्री गर्ने तयारी छ । अहिलेको याममा फुल्ने सयपत्री, मखमली तथा अन्य सिजनल फूलका विरुवासमेत प्रदर्शनीमा राखिनेछ ।


संस्थाका पूर्व अध्यक्ष दयाकुमार द्वाले तिहारमा लगाउने मालामा गण्डकी प्रदेश करिब आत्मनिर्भर भएको दाबी गर्छन् । उनी भन्छन्, ‘ढोकामा लगाउने, अरु पूजा गर्ने फूलको साइज नै फरक छ, भाइटीकामा लगाउने मालामा भने हामी करिब आत्मनिर्भर हुने अवस्थामा छौँ ।’ यसपालि असोज अन्तिमसम्मै वर्षा भएकाले सयपत्रीमा रोग लागेको उनको भनाइ छ ।

Advertisement

तपाईको प्रतिक्रिया