लेखनाथ ।
पोखरा २६ को अर्घौमा रहेको अर्घौ कृषि सहकारीले १४ औं स्थापना दिवसको अवसरमा सृजना बहिरा माविलाई सहयोग गरेको छ । सहकारीले सामाजिक उत्तरदायित्व अन्तर्गत पोखरा २६ मा रहेको सृजना बहिरा माविका लागि शैक्षिक सामग्री र खेलकुदका सामग्री सहयोग गरेको हो ।

हरेक वर्ष सहकारीले विभिन्न सामाजिक क्षेत्रमा गर्दै आएको छ । यस वर्ष सृजना बहिरा विद्यालयका लागि २ थान सूचना पाटी र खेलकुदका सामग्री विद्यालय व्यवस्थापन समिति अध्यक्ष प्रकाशलाल श्रेष्ठलाई सहकारीका संस्थापक अध्यक्ष विष्णुप्रसाद पौडेलले हस्तान्तरण गरेका हुन् ।

सहकारीका अध्यक्ष कलाधर पाण्डेको अध्यक्षतामा भएको कार्यक्रममा सृजना बहिरा विद्यालय व्यवस्थापन समिति अध्यक्ष प्रकाशलाल श्रेष्ठ, संस्थाका सल्लाहकार नारायणदत्त बस्ताकोटी र सदस्य मिनाकुमारी घर्तीमगर, सस्थाका सचिव हरिबहादुर लामिछाने र उपाध्यक्ष पार्वती भट्टराईले बोलेका थिए ।