सामुदायिक स्कुललाई बस किन्न महानगरकाे सहयोग

समाधान संवाददाता २०८० कार्तिक १९ गते १०:३९

पोखरा ।
पोखरा महानगरले नगर क्षेत्रका सामुदायिक विद्यालयलाई स्कुल बस किन्न सहयोग गर्दै आएको छ । महानगरले बस किन्न लागतको ५० प्रतिशत रकम दिने गरेको छ ।


बिहीबार महानगर प्रमुख धनराज आचार्यले पोखरा महानगरपालिका वडा नं. २४ कास्कीकोट स्थितमा रहेको कालिका माध्यमिक विद्यालयलाई स्कुल बस हस्तान्तरण गरे । महानगरले अघिल्ला आर्थिक वर्षमा ८ र यो आर्थिक वर्षमा ६ स्कुल बस हस्तान्तरण गरेको हो ।


पोखरा महानगरमा पछि गाभिएका ग्रामीण क्षेत्रका विद्यालयहरुलाई सहयोग गरिएको हो । ग्रामीण क्षेत्रका स्कुलमा विद्यार्थी कम हुँदै जाने र गुणस्तर पनि कमजोर बनेको गुनासो आएपछि ती समस्या सुल्झाउन महानगर लागेको प्रमुख धनराज आचार्य बताउँछन् । उनी भन्छन्, ‘साना विद्यार्थीको सुरक्षाको कुरा पनि भयो । सामुदायिक स्कुलमा विद्यार्थी टिकाउन र गुणस्तर सुधार्न बस सुविधाले योगदान पुग्ने अपेक्षा छ ।’

Advertisement


महानगरले हालै १७ बुँदे शैक्षिक सुधार निर्देशन जारी रहेको छ । यस्तै, नगर क्षेत्रका प्रधानाध्यापकहरुसँग कार्यसम्पादन सम्झौता गरी गुणस्तर सुधार्ने लक्ष्य लिएको छ । शिक्षा महाशाखा प्रमुख हेमप्रसाद आचार्यले भन्सार छुटमा आउने यस्तो एउटा स्कुल बसमा १४ देखि १५ लाख महानगरले दिने गरेको सुनाए । ग्रामीण क्षेत्रमा रहेका स्कुललाई टिकाउन र विद्यार्थीलाई घर नजिकै गुणस्तरीय शिक्षा सुनिश्चित गर्न महानगर लागेको उनको भनाइ छ ।


सामुदायिक स्कुलमा बस सेवा सुरु भएपछि विद्यार्थी र अभिभावकमा सकारात्मक प्रभाव परेको सरोकारवालाहरु बताउँछन् । एक महिनाअघि सहुलियतमा बस पाएको पोखरा–२५, हेमजामा रहेको विष्णुपादुका मावि विद्यालय व्यवस्थापन समिति अध्यक्ष कृष्ण नेपालीले विद्यार्थी संख्या बढेको र अभिभावक र विद्यार्थीहरु उत्साहित भएको सुनाए । बस सञ्चालन गर्न अब जनशक्ति, इन्धन र मर्मतसंहार चुनौती बन्ने जनाउँदै उनी थप्छन्, ‘बस त आयो । सञ्चालन खर्च जुटाउन न विद्यार्थीसँग शुल्क दिने अवस्था छ, न अरु स्रोत छ । यसमा स्थानीय सरकारले सघाउनुपर्छ ।’

Advertisement


महानगरले प्रधानाध्यापकहरुको सुविधा वृद्धि गरेको छ भने विद्यार्थीको दैनिक खाजा खर्च रकमसमेत थप गरेको छ । पोखरा महानगरले प्राविधिक जनशक्ति तयार गर्न गण्डकी बहुप्राविधिक शिक्षालयसमेत सञ्चालन गरेको छ । केही वडाले छात्रवृत्ति दिएर यहाँ वडावासीलाई प्राविधिक शिक्षा पढाइरहेका छन् । सिटिइभिटीबाट मान्यता प्राप्त शिक्षालयले डिप्लोमा तहमा सिभिल इन्जिनियरिङ, अटोमोवाइल इन्जिनियरिङ, जियोमेटिक्स इन्जिनियरिङ, फार्मेसी, सामान्य चिकित्सा (एचए) र वन विज्ञान कार्यक्रम चलाइरहेको छ ।

तपाईको प्रतिक्रिया