लेखनाथ ।
आफ्ना सेयर सदस्यहरुलाई कृषि उत्पादनतर्फ अग्रसर गराउने उद्देश्यले पोखरा २६ को सिलिंगे कृषि उत्पादन सहकारी संस्थाले आलुको बिउ वितरण गरेको छ । खेतबारी बाँझो राख्ने र बजारबाट तरकारी किनेर खाने चलनलाई केही हदसम्ममा भएपनि रोक्ने उद्देश्यका साथ सहकारीले ५० प्रतिशत अनुदानमा समय अनुसारका बिउबिजन वितरण गर्दै आएको हो ।

यसै क्रममा संस्थाले यो वर्ष सेयर सदस्यको आवश्यकतालाई बुझेर १ सय ८० कृषकहरुलाई करिब २ हजार किलो आलुको बिउ वितरण गरेको छ । कृषि ज्ञान केन्द्रको कास्कीको अनुदानमा उपलब्ध भएको बिउलाई किसानहरुलाई वितरण गरी तरकारीजन्य वस्तुमा आत्मनिर्भर हुन यस खालका कार्यक्रमले सहयोग पुग्ने विश्वास गरिएको संस्थाका अध्यक्ष ठाकुरप्रसाद रानाभाटले बताए ।

संस्थाले समयसमयमा कृषि औजार, अदुवाको बिउ लगायत मौसम अनुसारका तरकारीका बिउबिजनहरु वितरण गर्दै आएको संस्थाका व्यवस्थापक विकास रानाभाटले जानकारी दिए । संस्थाका अध्यक्ष ठाकुरप्रसाद रानाभाटको अध्यक्षतामा भएको कार्यक्रममा सचिव ईश्वरीप्रसाद अधिकारी, उपाध्यक्ष यदुनाथ बराल, सल्लाहकार मुरारी शर्मा, चन्द्रबहादुर रानाभाट र कृषि प्रवद्र्धन उपसमितिका संयोजक सूर्यप्रकाश बञ्जरा लगायतले आलुको बिउ पाएपछि किसानहरु उत्साहित भएकाले पुन थप बिउका लागि पहल गर्ने र किसानहरुले पनि व्यावसायिक रुपमा उत्पादन गरेर आफनो आयआर्जन बढाउनुपर्ने सुझाव राखेका थिए ।