पोखरा ।
नेपाल संवत् ११४४ को सुदर्शन कपिला सिरपाबाट नेवाः खलः कास्कीलाई पुरस्कृत गरिने भएको छ । नेपाल भाषा तथा सांस्कृतिक क्षेत्रमा दुई दशकभन्दा लामो समयदेखि काम गर्दै आएको झि पुचः (नेपाल भाषा तथा सांस्कृतिक संघ) विराटनगरका अध्यक्ष भविषकुमार श्रेष्ठले शुक्रबार पोखरामा नेवाःखलः कास्कीका कार्यसमिति र सल्लाहकार तथा सदस्यमाझ यस्तो जानकारी दिएका हुन् ।

नेवा खलः कास्कीका अध्यक्ष अशोक पालिखेले यस सम्मानले नेवार समुदायमा अझ धेरै भाइचारा बढ्ने बताउँदै संस्कृति संरक्षण र प्रवद्र्धनमा यसले ठूूलो सहयोग पुग्ने जनाए । सुदर्शन कपिला सिरपा पुरस्कारको स्थापना विसं २०७६ (नेपाल संवत् ११४०)मा झि पुचःका संरक्षक एवं समाजसेवी सुर्दशनबहादुर श्रेष्ठ तथा उनको परिवारले गरेको हो ।

यो पुरस्कार नेपाल भाषा तथा संस्कृतिको संरक्षण, संवद्र्धन एवं जगेर्ना गर्ने संस्था वा व्यक्तिलाई झि पुचःमार्फत प्रत्येक २ वर्षमा कदरस्वरुप प्रदान गरिन्छ । श्रेष्ठ तथा उनका परिवारले सुर्दशन कपिला सिरपाद्वारा सम्मान र २ लाख नगद पुरस्कार दिन २० लाखको अक्षयकोष खडा गर्ने उद्घोष गरेअनुसार झि पुचः विराटनगरले सुर्दशन कपिला ट्रष्टको विनियमावली बनाई विशेष समितिमार्फत काम गर्दै आएको छ ।