पोखरा ।
पोखराको बगरमा अवस्थित पोखरा आदर्श सेकेन्डरी स्कुलमा वार्षिक खेलकुद कार्यक्रम–२०८० बिहीबार सुरु भएको छ । विद्यालयका प्राचार्य फणीन्द्रप्रसाद अधिकारीको अध्यक्षतामा भएको उक्त खेलकुद कार्यक्रम गण्डकी एकेडमी फाउन्डेसनका अध्यक्ष कमलराज सापकोटालाई विद्यालयका प्राचार्य फणीन्द्रप्रसाद अधिकारीबाट भलिबल हस्तान्तरण गरी उदघाटन भएको थियो ।

सिनियर र जुनियर गरी दुई चरणमा रहेर खेलहरु खेलाइने जानकारी खेलकुद कार्यक्रम संयोजक तिलक बरालले दिए । प्रतियोगितामा हालसम्मको खेलअन्तर्गत सिनियरतर्फ भलिबल प्रतियोगितामा पहेँलो सदन प्रथम र हरियो सदनले द्वितीय स्थान हासिल गरेको छ ।

खुला टेबल टेनिस प्रतियोगितामा रितेश गुरुङ प्रथम, सचिन पुन द्वितीय र अविरल आचार्यले तृतीय स्थान हासिल गरेका छन् । पूर्व प्राथमिक तहतर्फ गुच्चा गन्ने खेल, १०० मि.दौड, मिठाइ टोक्ने दौड, चम्चा दौड, बेलुन फुटाउने खेल छन् । जुनियर तहतर्फ फुटबल, १०० मि. दौड, भित्र र बाहिर रहने खेल, स्किपिङ, कुर्सी दौड, रिले दौड, मेमोरी टेस्ट आदि खेल छन् ।

सिनियर तहतर्फ भलिबल, टग अफ वार, बास्केटबल, टेबल टेनिस, गुच्चा दौड, बोतल भर्ने खेल, हिसाब दौड, कुर्सी दौड, सियो र धागो दौड आदि खेल छन् । प्रतियोगितात्मक खेलहरु बुधबार, बिहीबार र शुक्रबार गरी ३ दिनसम्म रहने जानकारी विद्यालयका सहप्राचार्य ज्ञानेश्वर सुवेदीले दिए ।