पोखरा ।
नेकपा एमालेका अध्यक्ष तथा पूर्वप्रधानमन्त्री केपी शर्मा ओली सोमबार कर्णाली प्रदेशको दैलेख पुगेका छन् । अध्यक्ष ओलीले दैलेखमा भएको पेट्रोलियम अन्वेषणको विकल्प नभएको बताउदै दैलेखमा भएको पेट्रोलियम पदार्थको उत्खनन गर्नुपर्नेमा जोड दिए ।

उनले भने ‘दैलेख पुरातात्विक महत्वको जिल्ला मात्रै होइन, पेट्रोलियम पदार्थको राम्रो संभावना भएको जिल्ला पनि हो’, ‘हाम्रै (एमाले नेतृत्वको सरकारको) पालामा यसको थप खोज, अध्ययन र अनुसन्धानको काम अघि बढाउँनु पर्छ भनेर अन्वेषणको कामका लागि टोली खटाएका थियौं ।’

नेकपा एमालेले बिहीबारदेखि मध्यपहाडी लोकमार्ग केन्द्रित यात्रा सुरु गरेको छ । ‘झुलाघाट चिवाभञ्ज्याङ, समृद्धिका लागि संकल्प यात्रा’ अभियान सहित एमालेले बैतडीको झुलाघाटबाट पाँचथरको चियो भन्ज्याङसम्मको झण्डै १८ सय किलोमिटर लामो यात्रा सुरु गरेकाे हो ।

पुस १ गते सकिने चल्ने यात्रा दैनिक एक सय किलोमिटर यात्रा गर्ने एमालेले लक्ष्य राखेको छ । गठनलाई थप मजबुत पार्ने उद्देश्यका साथ गर्न लागिएको मध्यपहाडी यात्रामा २० हजारजना सहभागी हुने दाबी गरिएको छ। यात्राका क्रममा साना ठूला खालका सभा हुनेछन् ।