जोमसोम ।
लैंगिक हिंसा विरुद्धको १६ दिने अभियानको छेको पारेर जिल्ला प्रहरी कार्यालय मुस्ताङले यहाँका स्कुल तथा क्याम्पसमा अध्ययनरत विद्यार्थीलाई साइबर अपराध न्यूनीकरण गर्न अभियान सञ्चालन गरेको छ ।

घरपझोङ र थासाङ गाउँपालिकामा कक्षा ९ देखीमाथि स्नातक पढ्ने विद्यार्थीलाई साइबारे सचेतना कक्षा दिइएको हो । जिल्ला प्रहरी कार्यालय मुस्ताङले समुदाय प्रहरी साझेदारी अवधारणा अन्तर्गत विद्यालयहरुमै पुगेर साइबर अपराधबारे कक्षा सञ्चालन गर्दै आएको जिल्ला प्रहरी कार्यालय मुस्ताङका प्रहरी नायब उपरीक्षक भोजराज पाण्डेले बताए ।

अभियानका क्रममा घरपझोङ गाउँपालिकामा रहेको जनहित मावि, धौलागिरी आवासीय मावि, तेजनिरला जनहित बहुमुखी क्याम्पस, जनकल्याण आधारभूत र जनवाल मावि मार्फाका विद्यार्थीलाई तालिम दिएको छ । थासाङ गाउँपालिका अन्तर्गत योगेन्द्र मावि, जनआदर्श अमरसिंह मावि, ज्ञानोदय मावि र धौलागिरि प्राविधिक शिक्षालयका विद्यार्थीलाई पनि प्रहरीले साइबरबारे प्रकाश पारेको प्रहरी नायब उपरीक्षक पाण्डेले बताए ।

पछिल्लो समय प्रविधिको विकाससँगै विद्युतीय उपकरण कम्प्युटर, मोबाइल तथा यसको नेटवर्क प्रयोग गरी हुने कुनै पनि घटनालाई साइबर अपराधका रुपमा लिने गरिन्छ । इन्टरेनेटको माध्यमबाट सामाजिक सञ्जाल प्रयोग गरी चरित्र हत्या गर्ने, यौनजन्य हिंसा, क्रेडिड कार्ड तथा एकाउन्ट आदिबाट बैंकिङ कसुर गर्ने, अरुको विद्युतीय उपकरण तथा नेटवर्र्कमा क्षति पु¥याउने र राज्य विरुद्ध हानीनोक्सानी गर्ने गतिविधि बढ्दै गएका छन् ।

बुधबार थासाङको धौलागिरी प्राविधिक शिक्षालयका ९३ विद्यार्थीलाई मुस्ताङ प्रहरीले सचेतना दिएको शिक्षालयका प्रिन्सिपल खड्क सुब्बाले जानकारी दिए । कक्षाबाट विद्यार्थीले साइबर अपराध तथा सामाजिक सञ्जालको उपयोगबारेमा जानकारी पाएका छन् ।