पोखरा ।
पोखरामा आगामी पुस ९ गते मुवाँथाई च्याम्पियनसिप हुने भएको छ । प्रदेश खेलकुद परिषद् गण्डकीको आयोजना तथा नेपाल मुवाँथाई अर्गनाइजेसनको संयोजनमा खेल हुने तयभ एको हो ।

मार्सल आर्ट अन्तर्गतको मुवाथाई व्यवसायिक फाइट हो । प्रतियोगितामा सहभागि हुने सबै खेलाडीले नगद प्राप्त गर्ने छन् । ‘क्रिसमस डे’ को अवसर पारेर लेकसाइडमा आयोजना हुन लागेको प्रतियोगितामा नेपालका १९ क्लबका ३२ व्यावसायिक फाइटरहरुको सहभागिता रहनेछ । प्रतियोगितामा कुल १६ फाइट हुनेछन् ।

प्रतियोगिता संयोजक खगेन्द्र क्षेत्रीले दर्शकका लागि खेल निशुल्क रहेको जनाए । ‘यो व्यवसायिक फाइट हो । यहाँ सबै फाइटर छनोट भएर आएका छन् । थुप्रै क्लबले खेलाडी दर्ता गराए पनि हामीले नेपालमा प्रोफेसन रहेको फाइटरहरुलाई मात्र समेटेका छौं,’ उनले भने, ‘मुआथाईको प्रचार गर्नु हाम्रो मुख्य उदेश्य हो । अझ यसलाई लेकसाइडमा गर्नु भनेको बाह्य पर्यटकलाई आकर्षित गर्नु पनि हो ।’

विदेशीहरुले फाइट गेम निकै मन पराउने र लेकसाइडमा गर्दा खेलसँगै पर्यटक प्रवद्र्धनमा समेत टेवा पुग्ने उनी बताउँछन् । खेलाडीका लागि खाना, बस्न र आवश्यक खेल पोशाकको समेत आयोजकले नै व्यवस्था गर्ने छ । प्रतियोगितामा एमेचर, सेमी प्रो (प्रोफेसनल) र प्रो फाइट (प्रोफेसनल फाइट) गरी तीन विधामा खेल हुने छन् । वान फाइट सिस्टम अनुसार हुने फाइटमा खेलाडीले एक खेलमात्रै खेल्ने क्षेत्रीले जानकारी दिए ।

पछिल्लो समय मुवाँथाइको लोकप्रिय विश्वमा बढ्दै गएको छ । नेपालमा मुवाँथाईको व्यवसायिक खेलाडी उत्पादन गर्नेसमेत छ । प्रतियोगितामा खेलाडीको बिमासमेत आयोजकले गरेको छ । नेपाल राष्ट्रिय मुवाँथाई संघको प्राविधिक सहयोग छ ।