पोखरा ।
कास्कीको अन्नपूर्ण गाउँपालिकाको पदयात्रामा मृत्यु भएका ट्रेकिङ गाइड तुलबहादुुरको परिवारले १० लाख पाएको छ । गएको भदौ ३० गते अन्नपूर्ण पदयात्राका क्रममा तुलबहादुरको मृत्यु भएपछि ट्रेकिङ एजेन्सी एसोसिएसन अफ नेपाल (टान) गण्डकीले आइतबार परिवारलाई इन्सुरेन्सबाट प्राप्त भएको रकम हस्तान्तरण गरेको हो ।

तुलबहादुरका श्रीमतीद्वय मीनाकुमारी गुरुङ र पदमसुवा तामाङलाई चेकमार्फत १० लाख रुपैयाँ चेक हस्तान्तरण गरिएको टान गण्डकी अध्यक्ष धर्मराज पन्थीले जानकारी दिए । टान गण्डकी सदस्य रहेको इस्टर्न लाइट ट्रेक्स एन्ड एक्सपिडिसनमा काम गर्ने तुलबहादुर त्यस दिन कोरियन टोलीलाई अन्नपूर्णको पदयात्रामा लिएर गएका थिए ।

पदयात्राका जाँदा बिरामी भएपछि उनलाई उपचारका लागि पोखराको पश्चिमाञ्चल क्षेत्रीय अस्पतालमा ल्याइएकोमा सोही दिन बेलुका उनको मृत्यु भएको थियो । मृत्युपछि टानले इन्सुरेन्स कम्पनीसँग दुर्घटना बिमा दाबी गरेको थियो । टानले आफू अन्तर्गतका १ सय ६३ वटै टे«किङ कम्पनीमा आवद्ध कर्मचारीको सुरक्षाका लागि सिद्धार्थ प्रिमियर इन्स्योरेन्ससँग दुर्घटना बिमा गराएको छ ।

ट्रेकिङका क्रममा तुलबहादरको मृत्यु भएपछि टानले गरेको बिमा अन्तर्गत भुक्तानी गरिएको इन्सुरेन्सका गोविन्द देवकोटाले जानकारी दिए । टानले यसअघि दुर्घटनामा परेर मृत्यु हुने ५ जनाको परिवारलाई दुर्घटना बिमाको रकम हस्तान्तरण गरिसकेको छ ।