पोखरा ।
पोखराको लायन्स क्लब अफ पोखरा ग्यालेक्सी र हेटौंडा बजार लायन्स क्लबबीच मितेरी सम्बन्ध कायम भएको छ । सामाजिक कार्यमा सहकार्य गर्ने तथा क्लबका सदस्यहरुबीच भाइचारा अभिवृद्धि गर्ने उद्देश्यले २ क्लबबीच मितेरी सम्बन्ध कायम गरिएको हो । पोखरामा भएको कार्यक्रममा डिस्ट्रिक्ट ३२५ के नेपाल अन्तर्गतको पोखरा ग्यालेक्सी र डिस्ट्रिक्ट ३२५ एस अन्तर्गतको हेटौंडा बजारबीच अन्तरक्लब मितेरी सम्बन्धको पत्र आदानप्रदान भएको छ ।

पोखरा ग्यालेक्सीका अध्यक्ष अम्बरबहादुर थापा र हेटौंडा बजारका अध्यक्ष होमनाथ खनालले एक आपसमा पत्र आदानप्रदान गर्दे आगामि दिनमा सहकार्यका साथ अघि बढ्ने प्रतिबद्धता जनाए । कार्यक्रममा डिस्ट्रिक्ट ३२५ के नेपालका गभर्नर सुचित्रा थापाले २ सहरका, २ डिस्ट्रिकका फरक क्लबबीच भएको सहकार्यले लायनबादको यात्रालाई अझ मझबुत बनाउँदै लायन्सको माध्यमबाट हुने समाजसेवाको कार्य अझै प्रभावकारी हुने बताइन् ।

२ क्लबबीच भएको मितेरी साइनोलाई डिस्ट्रिक्ट ३२५ के नेपालका निवर्तमान गभर्नर राजेन्द्रकुमार बाटाजु, द्वितीय गभनएर दुर्गाप्रसाद हुमागाईं लगायतले मितेरी सम्बन्ध मझबुत हुँदै जाओस् भन्दै शुभकामना दिएका थिए । कार्यक्रम संयोजन ग्यालेक्सीका प्रथम उपाध्यक्ष राजेन्द्र आचार्यले गरेका थिए ।