पोखरा ।
स्याङ्जाको कोल्मामा भएको क्रस कन्ट्री दौडमा आर्मीले बर्चश्व जमाएको छ । सात सय कोल्मा बहाकोट सम्पर्क मञ्चले आयोजना गरेको चौथो संस्करणको क्रस कन्ट्री दौडमा आर्मीका धावकहरुले बर्चश्व कायम गरेका हुन् ।

क्रसकन्ट्री दौडको उपाधि त्रिभुवन आर्मीका गोपाल तामाङले जितेका छन् भने आर्मीकै सञ्जय श्रेष्ठ र सुशीलकुमार शाही उपविजेता र सेकेन्ड रनर अप हुन सफल भएका छन् । निर्धारित दूरी २५ किमी १ घन्टा ३१ मिनेट ५६ सेकेन्डमा पार गर्दै आर्मीका गोपालले उपाधिसँगै नगद ५० हजार, ट्रफी , मेडल र प्रमाणपत्र प्राप्त गरे ।

दूरी १ घण्टा ३३ मिनेट ४३ सेकेन्डमा पार गर्दै आर्मीकै सञ्जय उपविजेता बने । उनले नगद ४० हजार, ट्रफी, मेडल र प्रमाणपत्र प्राप्त गरे । प्रतियोगितामा आर्मीकै सुशीलकुमार शाहीले तेस्रो स्थानसहित नगद ३० हजार, ट्रफी, मेडल र प्रमाणपत्र हात पारे । उनले निर्धारित दूरी १ घन्टा ३४ मिनेट २ सेकेन्डमा पूरा गरेका थिए ।

२१ वर्ष मुनिको १० किमी पुरुष खुला दौडतर्फ तनहुँका सनम गुरुङले ४१ मिनेट १४ सेकेन्डमा पार गर्दै उपाधि हात पारे । गुरुङले नगद ३० हजार, ट्रफी, मेडल र प्रमाणपत्र प्राप्त गरे । सोही दूरी ४२ मिनेट ४३ सेकेन्डमा पार गर्दै पोखराका तेन्जेन रोका उपविजेता बन्न पुगे । रोकाले नगद २० हजार, ट्रफी, मेडल र प्रमाणपत्र प्रापत गरे ।

पोखराकै मनोज रोकाले ४२ मिनेट ५५ सेकेन्डमा पार गर्दै तृतीय स्थानसँगै नगद १० हजार, ट्रफी, मेडल र प्रमाणपत्र पाए । महिलातर्फको ५ किमी दौडको उपाधि जुम्लाका राममाया बुढाले हात पारिन् । बुढाले निर्धारित दूरी २१ मिनेट १८ सेकेन्डमा पार गर्दै उपाधिसँगै नगद १५ हजार, ट्रफी, मेडल र प्रमाणपत्र पाएकी हुन् ।

तोकिएको दूरी २३ मिनेट १६ सेकेन्डमा पार गर्दै दाङकी सुस्मिताकुमारी चौधरी उपविजेता बनिन् । उनले नगद १० हजार, ट्रफी, मेडल र प्रमाणपत्र प्राप्त गरिन् । पोखराका नितु तामाङले निर्धारित दूरी २५ मिनेट ३७ सेकेन्डमा पार गर्दै तेस्रो स्थान हासिल गर्न सफल भईन । तामाङले नगद ५ हजार, ट्रफी, मेडल र प्रमाणपत्र हात पारिन् ।

प्रतियोगिताका विजेतालाई बन्जी नेपाल पोखराले बन्जीका लागि समेत फ्री टिकट उपलब्ध गराएको छ । प्रतियोगितामा ११ वर्षीय एन्जिला जिटी सबभन्दा कम उमेर र ५८ वर्षीय गोविन्द नेपालीले समेत सहभागीता जनाएका थिए ।

प्रतियोगिताका विजेतालाई गण्डकी प्रदेशका सामाजिक बिकास तथा स्वास्थ्य मन्त्री सुशीला सिंखडा, गण्डकी प्रदेशका पूर्वमन्त्रीहरु दीपक चर्ती मगर र मेखलाल श्रेष्ठ, गण्डकी प्रदेशका पूर्व सांसद मीनप्रसाद गुरुङ, पुतलीबजार नगरपालिका मेयर तुलसीराम रेग्मी, सात सय कोल्मा सम्पर्क मञ्चका अध्यक्ष दुतप्रसाद गुरुङ लगायतले पुरस्कार वितरण गरेका थिए ।

सामाजिक विकास तथा स्वास्थ्य मन्त्री सिंखडाले खेलकुदको माध्यमबाट ग्रामीण क्षेत्रको विकासमा थप टेवा पुग्ने बताइन् । उनले कोल्माको विकासका लागि आफ्नो मन्त्रालयबाट सक्दो सहयोग गर्ने जनाइन् । पूर्व मन्त्री मेखलाल श्रेष्ठले सातसय कोल्मा सम्पर्क मञ्चले राष्ट्रिय स्तरको खेलकुद प्रतियोगिता गरी खेलकै माध्यमबाट कोल्मामा पर्यटक भित्र्याउन सफल भएको जनाए ।

अर्का पूर्वमन्त्री दीपक चर्तीमगरले खेलकुदकै माध्यमबाट स्याङ्जा र तनहँको सिमानामा पर्ने कोेल्मालाई राष्ट्रिय र अन्तर्राष्ट्रिय स्तरमा चिनाउन सफल भएको वताए । नेकपा एमाले गण्डकी प्रदेशक उपाध्यक्ष तथा पूर्व गण्डकी प्रदेश सभासद मीनप्रसाद गुरुङले कोल्माको विकासका लागि आफू सधैं तत्पर रहेको सुनाए ।

पुतलीबजार नगरपालिकाका मेयर तुलसीराम रेग्मीले पुलतीबजार ८ र ९ को विकाससँगै कोल्मा खेलकुद मैदानका लागि नगरपालिकाबाट सहयोग गर्ने जनाए । उनले गाउँ फर्किने अभियान कोल्माबाट सुरु भएको र यसलाई अन्य गाउका मानिसले समेत सिको गर्नुपर्ने औंल्याए ।

सो अवसरमा सातौं दक्षिण एसियन कराँते खेलमा कुमिते क्याटगोरीमा स्वर्ण पदक विजेता तनहु देवघाट ५ का पार्वती गुरुङलाई सम्मान गरिएको थियो । सात सय कोल्मा सम्पर्क मञ्चका अध्यक्ष दुतप्रसाद गुरुङको अध्यक्षतामा भएको कार्यक्रममा मञ्चका अक्षयकोष संयोजक चित्रबहादुर गुरुङ, पुतलीबजार नगरपालिका वडा नम्बर ९ का अध्यक्ष लीलप्रसाद गुरुङ, मञ्चका महासचिव जीवन पोख्रेल र सचिव जीवन थापामगरले बोलेका थिए ।