पोखरा ।
अन्नपूर्ण आधार शिविरको प्रस्थान विन्दु कास्कीको अन्नपूर्ण गाउँपालिका ११ स्थित छोम्रोङमा २२ औं सेन्चुरी ल्होसार मेला सुरू भएको छ । सेन्चुरी युवा क्लबले आयोजना गरेको मेला गण्डकी प्रदेश सभा सदस्य प्रकाश बरालले बिहीबार उद्घाटन गरे ।

मेला १५ पुससम्म चल्नेछ । सांसद बरालले छोम्रोङमा अधुरो रहेको टेनिस कोर्ट निर्माण पूरा गर्ने प्रतिबद्धता जनाए । अन्नपूर्ण आधार शिविर पदमार्गको स्तरोन्नति गर्न पनि प्रदेश सरकारसँग बजेटका लागि समेत पहल गर्ने उनले जनाए ।

अन्नपूर्ण–११ का वडाध्यक्ष हिमबहादुर गुरूङले केन्द्रीय विद्युतको पहुँच अन्नपूर्ण आधार शिविरसम्म पु¥याउन पहल भइरहेको जानकारी दिए । मेलामा क्लबस्तरीय पुरूष भलिबल र बास्केटबल प्रतियोगिता, ठेलो प्रतियोगिता, रस्साकस्सी र घैंटो फुटाउने प्रतियोगिता हुने छन् ।

पुरूष भलिबल प्रतियोगिताका विजेताले ५० हजार र उपविजेताले ३० हजारसहित ट्रफी, मेडल र प्रमाणपत्र पाउने सेञ्चुरी युवा क्लबका अध्यक्ष मिकास गुरूङले बताए । बास्केटबल प्रतियोगिताको विजेता र उपविजेताले क्रमशः ३० हजार र २० हजार रूपैयाँ, ट्रफी, मेडल र प्रमाणपत्र पाउने छन् ।

भलिबलमा १२ र बास्केटबलमा १७ टिमबीच प्रतिस्पर्धा हुनेछ । ठेलो हान्ने प्रतियोगिताका विजेता र उपविजेताले क्रमशः १० हजार र ५ हजार रूपैयाँसहित मेडल र प्रमाणपत्र पुरस्कार पाउने छन् । मेलाको पहिलो दिन बिहीबार साँझ अन्नपूर्ण ब्यान्ड छोम्रोङमा गुञ्जियो । बाँकी दिनमा लोकदोहोरी कलाकार र आदिम कला मञ्चले प्रस्तुति राख्ने आयोजकले जनाएको छ ।