पाेखरा ।

गणतन्त्र र संघीयतामाथि निरन्तर प्रहार भइरहेकाले सरकार गम्भीर हुनुपर्ने सत्ता गठन्धन र प्रमुख प्रतिपक्ष दलकै नेताहरुले बोल्दै आएका छन् । पुस २७ गते पोखरामा भएको नेपालको संविधान र कार्यान्वयनको चुनौती विषयक अन्तरक्रिया कार्यक्रममा प्रमुख तीन दलका नेताहरुले एउटै स्वर बोेलेका छन् ।

टंक प्रसाद आचार्य स्मृति प्रतिष्ठान काठमाडौँ, अनौपचारिक क्षेत्र सेवा केन्द्र (इन्सेक) र सयपत्री समाजको आयोजनामा नेपालको संविधान र कार्यान्वयनको चुनौती विषयक अन्तरक्रिया पोखरामा प्रमुख तीन दलका नेताहरुले गणतन्त्र विरोधी आवाज उठेकाले सबै दल एक जुट भएर सामना गर्नुपर्ने जोड दिएका छन् ।

कार्यक्रममा नेताहरुले पछिल्लो घटनाक्रमले गणतन्त्र खतरामा परेकाले सरकारलाई यस्ता गतिविधिमा निगरानी बढाउन आग्रह गरेका छन् । नेपाली कांग्रेस कास्कीका सचिव देवेन्द्र रानाभाटले सरकारले संविधान विरोधी गतिविधि गर्ने हरुप्रति कारबाही नभएको बताएका हुन् । उनले जनताका आधारभूत कुराहरु पुरा गर्ने जिम्मेवारी सरकारको भएतापनि पुरा हुन नसक्दा यस्तो अवस्था आएको सुनाए ।

नेकपा एमाले कास्कीका अध्यक्ष मान बहादुर गुरुङले निर्वाचन प्रणाली समानुपातिक भएर संविधान कार्यान्वयन गर्न चुनौती भएको बताए । उनले अहिलेको अवस्थामा संविधान नचलाउनुनै उचित हुने सुनाए । त्यस्तै माओवादीको तर्फबाट बिनय थापाले नेपालको संविधान पहिलो पटक नेपालको सार्वभौम जनताले जारी गरेको संविधान रहेको बताए । उनले सविधान भनेको समय र आवश्यकता अनुरुप बदलिदै जाने प्रतिवधर्ता जाहेर गरे । उनले सबै पार्टीहरु तथा नागरिक समाजले साझा राष्ट्रप्रति एउटै धारणा राखेर आगाडि बढ्नु आवश्यक रहेको सुनाए ।

कार्यक्रममा टंक प्रसाद आचार्य स्मृति प्रतिष्ठानका अध्यक्ष तथा इन्सेकका संस्थापक अध्यक्ष सुशिल प्याकुरेलले नेपालको संविधानको कार्यान्वयन र चुनौतीको विषयमा प्रस्तुती गरे । उनले नेपाल लोकतान्त्रिक गणतन्त्र मुलुक रहेकोले नागरिकले धेरै अधिकारहरु पाएको बताए । तर राज्यप्रणाली निकै कमजोर हुदाँ संविधान कार्यान्वयनको पाटो अझै पनि आम जनताले चाहे अनुरुप बन्न नसकेको सुनाए । उनले बाह्य हस्तक्षेपले गर्दा नेपालको सविधान खतरामा रहेको बताउदै आम नागरिक एक ठाउँमा आएर सरकारलाई झक्झक्याएर राजनिति सच्याउनु पर्ने बताए ।

कार्यक्रममा वरिष्ठ पत्रकार लेखक तथा समीक्षक कनकमणि दिक्षितले बाह्य हस्तक्षेपले नेपालको संविधान तथा लोकतन्त्रमाथि धावा बोल्दै गर्दा नेपालको सार्वभौमिकता खतरामा रहेको सुनाए । उनले नेपालको राजनिति ओरालो लाग्दो भएपनि नेपाल अरु मुलुक भन्दा स्वतन्त्र र जनताले स्वतन्त्रतापूर्वक बोल्न पाउने देश भने नेपालनै रहेको बताए ।

उनले नेपालको हरेक गतिविधिहरुमा बाह्य देशको हस्तक्षेपले नेपालको लागि खतरा भएको बताए । उनले संविधान कार्यान्वयनको मुख्य चुनौती भनेकोनै संविधान खारेज हुने अवस्था आउन सक्नु रहेको सुनाए । कार्यक्रममा प्राध्यापक विश्वकल्याण पराजुलीले नेपाल दुई ठुला देशहरुको बिचमा परेर संकटमा परेको सुनाए । देशमा समावेशी नाममा मात्र सिमित रहेकोले यसको सहि ठाउँमा प्रयोग नभएकोले समस्या भएको उनको भनाइ थियो । कार्यक्रममा राजनितिक पार्टीका प्रतिनिधिहरु नागरिक समाजमा प्रतिनिधिहरुले आ—आफ्नो धारण राख्नुभएका थिए ।