पोखरा ।
ढुंगेसाँघु मेलाका अवसरमा महानगर स्तरीय कृषि जैविक विविधता मेला तथा कन्दमूल एवं परिकार प्रदर्शनी भएको छ । पोखरा महानगरपालिका अन्तरगत आर्थिक विकास महाशाखाको आयोजनामा प्रदर्शनी गरिएको हो ।

सो अवसरमा घरमा उत्पादनमा भएको कन्दमूल प्रदर्शनी प्रतियोगिता, वनमा उत्पादन भएको कन्दमूल प्रदर्शनी प्रतियोगिता, माघी परिकार प्रदर्शनी प्रतियोगिता, जैविक विविधतासम्बन्धी कृषि गीत प्रतियोगितासमेत गरिएको महाशाखा प्रमुख मनहर कडरियाले जानकारी दिए । मेलामा स्थानीय जातका लोपोन्मुख उत्पादनका विउबिजनसहित १० थरी तरुल, गिठा, भ्याकुर, पिँडालुतर्फ १० थरी र ३ थरीका सखरखण्ड प्रदर्शन गरिएको छ । बागवानी अनुसन्धानका केन्द्रमा तयार गरिएका कन्दमूलहरूसमेत प्रदर्शन गरिएको छ ।

मेलामा पोखरा महानगरपालिकाका प्रमुख धनराज आचार्यले स्थानीय उत्पादन वृद्धि र उत्पादनको बजार सुनिश्चितताका लागि आवश्यक व्यवस्थापन गर्ने बताए । कृषकलाई अनुदान तथा साझेदारी कार्यक्रममार्फत सहुलियत प्रदान गर्दै प्रांगारिक उत्पादनमा हौसला प्रदान गरिएको उनले उल्लेख गरे । परम्परागत खेती प्रणालीलाई आधुनिकीकरणतर्फ लैजाँदै यान्त्रीकरणलाई समेत विशेष जोड दिइएको उनको भनाइ छ ।

मेलाका अवसरमा गरिएको जैविक विविधता विषयक कृषि गीत प्रतियोगितामा कृषि सञ्जाल ३३ प्रथम भएको छ । सफल महिला कृषक समूह पोखरा २९ दोस्रो, कृषि सञ्जाल २५ तेस्रो र कृषि सञ्जाल ३० सान्त्वना भएका छन् ।

कन्दमूल प्रदर्शनी तथा प्रतियोगितामामा सहभागी १५ समूहले २३ थरी परिकार प्रदर्शन गरेका छन् । घरमा उत्पादित कन्दमूलतर्फ देवीलाल बराल पोखरा २२ प्रथम, सीता अधिकारी पोखरा ३३ दोस्रो, सीता कुँवर पोखरा २५ तेस्रो र रामजी पौडेल पोखरा २२ सान्त्वना भएका छन् । वनमा उत्पादित कन्दमूलतर्फ प्रदीप ढकाल पोखरा २२ प्रथम, चमेरे गुफा कृषक समूह पोखरा १६ दोस्रो, टेकनाथ बराल पोखरा १३ तेस्रो, र देवीलाल बराल, पोखरा २२ सान्त्वना भए ।

विजेतालाई पोखरा १७ की वडाध्यक्ष राधिकाकुमारी शाही योगीले नगदसहित प्रमाणपत्र प्रदान गरिन् ।