पोखरा ।
१८ औं सफल पोखरा अन्तर्राष्ट्रिय म्याराथनको तयारीबारे बिहीबार अन्तरक्रिया भएको छ । नेपाल भूपपूर्व खेलाडी मञ्चको आयोजनामा हुने अन्तर्राष्ट्रिय म्याराथनलाई व्यवस्थित र प्रविधिमैत्री बनाउने उदेश्यका साथ विभिन्न संघ, संस्थासँग छलफल गरिएको हो ।

अन्तरक्रियामा सहभागी संस्थाका प्रतिनिधिले सफल पोखरा अन्तर्राष्ट्रिय म्याराथनलाई भव्य र सभ्य बनाउनका लागि आर्थिक, भौतिक र नैतिक रुपमा साथ र सहयोग गर्ने प्रतिवद्धता गरेका छन् । पोखरा उद्योग वाणिज्य संघका अध्यक्ष पवनकुमार प्रजापतीले संघमा आबद्ध सदस्य उद्योगी तथा व्यापारीको तर्फबाट गर्न सक्ने सहयोग गर्ने वाचा गरे ।

नेपात्र पत्रकार महासंघ कास्कीका निवर्तमान अध्यक्ष दीपेन्द्र श्रेष्ठले विदेशी धावकहरुको प्रोफाइल बनाउन आग्रह गरे । प्रतियोगिता अन्तर्राष्ट्रिय भइरहँदा त्यहाँ आउने धावकले अन्य उपाधि जितेको भए त्यसको प्रोफाइल सार्वजानिक गर्दा थप रोचक हुने उनको भनाइ छ । साथै, विद्यार्थीलाई दौडने तरिका प्रतियोगिता हुनुअगावै एक पटक विद्यालयहरुमा पुगी सिकाउनसमेत उनले सुझाव दिए ।

हिसान गण्डकी अध्यक्ष रमाकान्त बरालले विद्यार्थीको सहभागिताका लागि आवश्यक जानकारी नपाएको सुनाए । उनले विद्यार्थी सहभागितालाई सहज बनाउनका लागि विद्यालयहरुमा जानकारी गराउने वातावरण मिलाइदिन अनुरोध गरे ।