पोखरा ।
उद्योग, पर्यटन, वन तथा वातावरण मन्त्रालय गण्डकी प्रदेशका सचिव डा रामचन्द्र कँडेलले नेपालमा जलवायु परिवर्तनले असर गरे पनि कमजोर नीति र विश्वसामु बोली नपुग्दा नेपाल समस्यामा परेको बताएका छन् । युएसएआइडी जल जंगल परियोजनाद्वारा आयोजित ३ दिने तालिममा डा. कँँडेलले कार्बन व्यापार, मानव वन्यजन्तुबीचको सम्वन्ध, खेतीपातीमा प्रयोग हुने विषादी, क्षतिपूर्तिको व्यवस्था, मानव सिर्जित आधुनिकताको बढ्दो प्रभावले नेपालमा जलबायु परिवर्तनले अनेकन समस्या पैदा गरेको औंल्याए ।

कास्कीको अन्नपूर्ण र रुपा तथा स्याङ्जाक आँधिखोला र फेदीखोला गाउँपालिकालाई केन्द्रमा राखेर युएसएआइडी जल जंगल परियोजनाले गरेको तालिममा २८ जनाको सहभागिता छ । कार्यक्रमका सहजकर्ता किरण न्यौपानेले वन तथा जलस्रोत संरक्षणका क्षेत्रमा प्राप्त सफलतामा आधारित रही स्थानीय समुदाय, सरकार र संरक्षणकर्मीको जैविक विविधता संरक्षण र जलवायु परिवर्तन अनुकूलनको क्षेत्रमा क्षमता अभिवृद्धि गर्न तालिम दिइएको जनाए ।

युएसएआइडी जल जंगल परियोजनाले प्राकृतिक स्रोत संरक्षणमा सहयोग पुर्‍याउने लक्ष्य रहेको युएसएआईडी जल जंगल परियोजनाका ल्यान्डस्केप टिम लिडर मानबहादुर विक बताउँछन् । तालिमले स्वास्थ्यमा सुधार, वातावरणीय अपराध रोकथाम तथा नियन्त्रण र जलवायु परिवर्तन अनुकूलन तथा प्राकृतिक विपद्का लागि पूर्वतयारीमा समुदायको क्षमता अभिवृद्धि गर्ने परियोजनाले जनाएको छ ।

गण्डकी प्रदेशलाई केन्द्रमा राखेर स्थापना भएको जलजंगल परियोजनाले जोखिम न्यूनीकरण, प्राकृतिक प्रणाली तथा जैविक विविधताको दिगोपना तथा संकटासन्न समूहहरूको जीविकोपार्जन, खाद्य सुरक्षा र आय आर्जनमा सहयोग पुर्‍याउनुका साथै नदी किनार संरक्षण, हिमताल फुटेर आउने बाढीको रोकथाम जस्ता स्थानीय तहको नेतृत्वमा हुने क्रियाकलापमा आधारित तालिम भएको युएसएआईडीका ल्यान्डस्केप टिम लिडर विकले सुनाए ।

तालिममा रुपान्तरण नेपालका कोअडिनेटर सोहनलाल श्रेष्ठ, रेविका गुरुङ, डा. कल्पना देवकोटा लगायतले प्रशिक्षण दिने छन् । शुक्रबारबाट सुरु भएको तालिम आइतबारसम्म चल्नेछ ।