पोखरा ।
पोखरा महानगर पालिका वडा नम्बर ६, बैदाम नारेश्वरमा अवस्थित उपकार बचत तथा ऋण सहकारी संस्थाले आफ्नो स्थापना दिवस वडास्तरीय सरसफाइ गरी मनाएको छ । सहकारीले शनिबार १५ औं स्थापना दिवसको अवसर पारेर सामाजिक उत्तरदायित्व अन्तर्गत ‘हाम्रो पोखरा सफा बैदाम’ भन्ने मूलनारालाई सार्थक बनाउन कार्यक्रम आयोजना गरेको हो ।

पोखरा महानगर पालिका वडा नम्बर ६ बैदाममा रहेका १७ वटा आमा समूहहरुको सहभागितामा बैदाम क्षेत्रको सत्राैं स्थानबाट एकसाथ सुरु गरी सरसफाइ अभियान थालिएको थियो । अभियानमा ८० बोरा नकुहिने प्लास्टिक जन्य फोहोर संकलन गरिएको संस्थाका सचिव सुन्दरराज पहारीले जानकारी गराएका थिए ।

कार्यक्रममा सहकारीका सदस्यहरु सहित आमा समूहहरु गरी करिब १ सय ५० जनाको बृहत सहभागितामा फोहर संकलन गरिको थियो । पोखरा महानगर पालिका फोहोर व्यवस्थापन समितिसँग समन्वय गरी व्यवस्थापन गरिएको लेखा समितिका सदस्य हेडम्बराज अधिकारीले जानकारी दिए ।

सफाई अभियानको उद्घाटन गर्दै पोखरा महानगर पालिका वडा नम्बर ६ का अध्यक्ष विष्णुबहादुर भट्टराईले बैदाम क्षेत्र पर्यटकीय क्षेत्र भएकाले यस क्षेत्रको सरसफाईमा सबै संघसंस्था लाग्नुपर्नेमा जोड दिए । संस्थाका अध्यक्ष सूर्यनाथ पहारीले सामाजिक उत्तरदायित्व अन्तर्गत संस्थाले विभिन्न सामाजिक कार्य गर्दै आएको बताए ।

२०६५ सालमा स्थापना भएको सहकारीमा ९ करोड ४० लाख सेयर पुँजी छ । ४२ करोड रुपैया भन्दा माथि लगानी रहेको सहकारीमा तरलता प्रतिशत २५५ छ । खुला सदस्य नीति अनुरुप हालसम्म ३ सय ७२ जना सेयर सदस्य छन् ।