पोखरा ।
नेपाली कांग्रेस कास्कीले पोखरा महानगरपालिकाका प्रमुख धनराज आचार्यलाई सोमबार ज्ञापनपत्र बुझाएको छ । पोखरा महानगरपालिकाले आर्थिक वर्ष २०८०/०८१ का लागि अस्वाभाविक रुपमा बढाएको करको विरोध गर्दै ज्ञापनपत्र बुझाइएको हो ।

कास्की कांग्रेस सभापति किशोरदत्त बराल नेतृत्वमा गएको टोलीले ज्ञापनपत्र बुझाएको थियो । ज्ञापनपत्रमा अस्वाभाविक कर वृद्धि घटाउनका लागि पटक पटक अनुरोध गर्दा पनि महानगरले त्यसतर्फ उचित ध्यान नदिएकोमा ध्यानाकर्षण भएको उल्लेख गर्दै राजस्व प्रशासनलाई व्यवस्थित र वैज्ञानिक बनाउन अनुरोध गरिएको छ ।

ज्ञापनपत्रमा कर घटाउन माग गर्दै महानगरको राजस्व वृद्वि के कसरी गर्न सकिन्छ भन्ने सम्बन्धमा विभिन्न १२ बुँदे सुझाव पनि दिइएको छ । सुझावहरुमा करको विषयमा सोचाइको परम्परागत घेराभन्दा बाहिर निस्कन, धेरै कर उठाउने नीति होइन, धेरै करदाता सिर्जना गर्ने नीति अवलम्बन गर्न, कर बढाएरमात्रै राजस्वको वृद्धि हुँदैन भन्ने गाम्भीर्यलाई महसुुस गर्न, लगनशीलता र मितव्ययीताको परम्परालाई स्थापित गर्न र पोखराका निम्ति सपना देख्न र सपना देखाउन भनिएको छ ।

त्यस्तै, दक्ष जनशक्तिको व्यवस्थापन गर्न, समृद्धिका लागि सबै तहका सरकारसँग समन्वय गर्न, कम लगानीमा देखिने गरी विकासका काम गर्न, विकासको योजना प्राथमिकताको आधारमा तय गर्न, जनतालाई नवप्रवर्धनात्मक उद्यमशीलता र उत्पादनसँग जोड्न, बेरुजु र बाँकी बक्यौता उठाउने इमान्दार प्रयास गर्न, करको दायरा वृद्धिका लागि व्यवस्थित अध्ययन÷अनुसन्धान गर्न, पर्यटन मैत्री शिष्टाचार र संस्कारको निर्माण गर्न पनि सुझाव दिइएको छ ।

कास्की कांग्रेसले पोखराका प्रतिष्ठित उद्योग व्यवसायी, स्थानीय वुद्धिजीवीहरु र पार्टीका नेता तथा शुभचिन्तकको राय, सल्लाह र सुझावको आधारमा ज्ञापनपत्र तयार पारेको हो । ‘ज्ञापनपत्रमा समेटिएका विषयहरु कांग्रेसका विषयमात्र छैनन्, पोखरेलीको भावना र आवश्यकताहरु हुन्,’ कास्की कांग्रेसका सभापति किशोरदत्त बरालले भने, ‘जिम्मेवार पार्टी भएका कारण मागमात्र गरेका छैनौं, निकासका लागि सुझाव पनि दिएका छौं ।’

नेपालको राजनीतिलाई समृद्ध बनाउन र आगामी दिनमा आफ्ना जनप्रतिनिधिलाई जिम्मेवार र उत्तरदायी बनाएर जनताका पक्षमा काम गर्नका लागि थप ऊर्जा र प्रेरणा प्रदान गर्ने छ भन्ने कुरामा नेपाली काँग्रेस, कास्की विश्वस्त रहेको ज्ञापनपत्रमा भनिएको छ ।