लेखनाथ ।
पोखरा महानगरपालिका वडा नं २६ को अर्घौमा रहेको सिर्जना बहिरा माविको छात्रावासमा बस्ने विद्यार्थीलाई चिसोबाट बचाउनका लागि २ वटा गिजर सहयोग गरिएको छ । जाडोको समयमा विद्यार्थीलाई तातो पानीको सुविधा उपलब्ध गराउने उद्देश्यले पोखरा महानगरपालिका वडा नं २६ को तर्फवाट २ वटा गिजर वडाध्यक्ष नरेन्द्र थापाले आइतबार एक कार्यक्रमका बिच स्कुललाई प्रदान गरेका हुन् ।

विद्यालयका विद्यार्थी, शिक्षक, कर्मचारीको उपस्थितिमा अध्यक्ष थापाले विद्यालय व्यवस्थापन समिति अध्यक्ष प्रकाशलाल श्रेष्ठलाई ती सामग्री हस्तान्त्रण गरेका हुन् । अध्यक्ष थापाले छात्रावासमा बस्ने विद्यार्थीलाई जाडोको समयमा नुहाउनदेखि हातमुख धुनसमेत असुविधा पुगिरहेको अवस्थामा चिसोबाट बच्नका लागि वडाबाट गरिएको सहयोगलाई पूर्णरुपमा प्रयोग गर्न आग्रह गरेका थिए । विद्यालयमा ४६ जिल्लाका २ सय २५ जनामध्ये छात्रावासमा १ सय ५० जना बस्दै आएका छन् ।