पोखरा ।
कास्कीको पोखरा र बागलुङमा सहकारी खोली बचत हिनामिना गरेको अभियोगमा फरार ढोरपाटन नगरपालिकाका प्रमुख देवकुमार नेपालीविरुद्ध रेड कर्नर नोटिस जारी भएको छ । नेपालीले पोखरा र बागलुङमा रहेका इमेज सहकारीबाट बचतकर्ताको डेढ अर्ब र विभिन्न बैंकको ३५ करोड हिनामिना गरेको बताइन्छ ।

नेपाल प्रहरीका केन्द्रीय प्रहरी प्रवक्ता भीमप्रसाद ढकालले हालसालै नेपालीविरुद्ध रेड कर्नर नोटिस जारी भएको पुष्टि गरे । ‘उहाँविरुद्ध नोटिस जारी भएको छ, चाडै उहाँ पक्राउ पर्नुहुनेछ । इन्टरपोटमार्फत् उहाँको खोजी जारी छ,’ उहाँले भन्नुभयो । बागलुङको ढोरपाटन नगरपालिकाका प्रमुख नेपाली गएको वैशाखदेखि सम्पर्कबाहिर छन् ।

नेपालीको समूहले पोखरा र बागलुङमा एकै नाममा दुई सहकारी इमेज बचत तथा ऋण सहकारी खोली बचत हिनामिना गरेको प्रहरी अभियोग छ । इमेज सहकारी प्रकरणमा अदालतले आठ जनाविरुद्ध जेठमै पक्राउ पुर्जी जारी गरेको थियो । उनीहरुविरुद्ध एक हजार पाँच सय ५० बचतकर्ताले प्रहरीमा उजुरी दिएका छन् ।

इमेज सहकारीका अनिता बुढामगर, चित्रबहादुर भण्डारी, शक्ति किसान नरमती बुढा र डोरबहादुर परियार पक्राउ परिसकेका छन् । सहकारीकी कोषाध्यक्ष लक्ष्मी सेन सुनारलाई बिहीबार प्रहरीले पक्राउ गरेको छ । प्रमुख नेपाली बिहीबार भएको राष्ट्रियसभा निर्वाचनमा समेत मत दिन आएनन् । यो बिच दुई पटक विभिन्न माध्यमबाट सम्पर्कमा आई नेपालीले आफ्नो जायजेथमा बिक्री गरी बचतकर्ताको रकम फिर्ता गर्न चाहेको जनाएका छन् ।