पोखरा ।
नेकपा एमालेका उपमहासचिव पृथ्वीसुब्बा गुरुङले संघमा १२ वटामात्रै मन्त्रालय बनाउन प्रस्ताव गरेका छन् । गण्डकी प्रदेशका संस्थापक मुख्यमन्त्रीसमेत रहेका उपमहासचिव गुरुङले संघमा १२ र प्रदेशमा ७ वटामात्रै मन्त्रालय भए पुग्ने बताएका हुन् ।

संघीयतामा खर्च धेरै भयो भन्ने आलोचनाबाट बच्न पनि संघमा रहेका २५ मन्त्रालय कटौती गरेर १२ वटामा झार्नुपर्ने उनको तर्क छ । मंगलबार काठमाडौंमा आयोजित ‘अभ्यासमा संघीय लोकतान्त्रिक गणतन्त्र’ विषयक राष्ट्रिय गोष्ठीमा उपमहासचिव गुरुङले संघीय सरकार मातहतका विभाग कटौती गर्न र जिल्ला समन्वय समिति हटाउनु पर्नेसमेत उल्लेख गरे ।

प्रदेश र स्थानीय सरकारले संघीय सरकारले गर्ने काम पनि गर्ने भएकाले त्यहाँका विभाग हटाएर त्यहाँ कार्यरत कर्मचारीलाई तत्काल प्रदेश र स्थानीय तहमा व्यवस्थापन गर्न सके संघीयता कामकाजी हुने उनले दाबी गरे । गुरुङले संघीयतामा धेरै काम भए पनि त्यसको प्रचार हुन नसकेको पनि जनाए ।

उपमहासचिव गुरुङले प्रदेश र स्थानीय तहको कामलाई प्रभावकारी बनाउन पनि संघीय सरकारले तत्काल जनशक्ति र प्रहरी प्रशासनको आवश्यक व्यवस्थापन गर्न ढिलाइ गर्न नहुने औंल्याए ।